2023-05-11 11:34:19
Хизмат машинаси хизмат доирасида бўлиши керак эмасми?..
Раҳбар, бирор йўналишга мутасадди бўлишнинг катта масъулияти бор. Бироқ бизда бу тушунчани кўпчилик турлича тушунади: “Энди мен раҳбарман, шу соҳага масъулманми, истаганимни қилсам бўлади” дегувчилар, афсуски, орамизда кўпчиликни ташкил этади.
Аммо ҳозир раҳбар қандай бўлиш мавзуида эмас, балки бошқа бир масала ҳақида сўз юритмоқчимиз. Эътибор қилганмисиз, фарзандингизни боғчага ёки мактабга олиб бориб қўйганингизда кўзингиз нимага тушади?
Давлат томонидан берилган хизмат машиналари кўплигига... Улар боғча ёки мактабга болажонларни олиб келиб қўяди ва машғулотлар тугагач яна олиб кетади.
Айниқса, хусусий боғча ва мактаблар атрофида ойнаси қора тонировка билан қопланган хизмат автомобилларини тез-тез учратасиз. Кўча-кўйда ҳам хизмат машиналари рўзғор учун хизмат қилаётганига кўз тушади.
Бу автомобиллар ҳарфларига назар солсангиз, энг катта идоралардан тортиб, қонун чиқарувчи, ижро этувчи, вазирлигу ҳокимликлар машиналари борлигига гувоҳ бўласиз. Хўш, хизмат машиналари шахсий масалаларни ҳал этиш учун берилганми?
Ҳозир бу мақолани ўқиш чоғида ўша мутасадди “ишга келишдан олдин фарзандимни ташлаб келяпман, нимаси ёмон?” дейиши мумкин. Аммо бундайларнинг дунёқарашини эскича қолипда қолиб кетган дея изоҳлаш энг тўғри баҳо бўлади. Бу хизмат вазифасини суиистеъмол қилиш билан тенг ҳолатдир. Ахир, хизмат машинаси хизмат доирасида бўлиши керак эмасми?..
Энди буни ким назорат қилади, деган савол ўйлантиради? Вазирлар Маҳкамасими ёки ундан юқори турувчи идорами? Ёки ЙПХми? Хуллас, саволли ҳолатлар. Ҳар тонг хаёлимдан шулар ўтади...
Бизни кузатишда давом этинг @platformauzb
Батафсил: https://t.me/+UaAfANSlNTEwYmQy
2.4K views08:34