Эскича фикрлайдиган раҳбарлар диққатига! Ҳақиқатнинг, адолатн | platforma.uz

Эскича фикрлайдиган раҳбарлар диққатига!

Ҳақиқатнинг, адолатнинг юзига парда тортманг!

Ғалати бир ҳолат бор. Буни совет ва постсовет йилларида шаклланган ахлоқий кўникма, дейиш мумкин. Бу ўз хатоси учун бошқаларни айбдор кўрсатиш, айбини бекитиш учун ўзгани айблаш синдромидир.

Бу бизга бегона усул эмас. Оддий қилиб айтганда, бу шундай: матбуот ёки блогер танқид қилади, танқидга учраган томон бу "заказ мақола" дея жар солади, ўзини оқлашга уринади.

Ўтган даврда бутун дунё матбуоти Ўзбекистон ҳақида "заказ мақола" ёзганини ҳаммамиз яхши биламиз. "Мамлакатда эркинлик йўқ" деб ёзишса, буни душманларимиз буюртма қилишган, бизни кўролмаётир, "менга қандай яшамоқни ўргатмагин сен" деб ўзимизни овутардик, халқни алдардик.

Майли, бу давлат миқёсидаги гап. Шу синдром бугунги очиқлик замонида ҳам яшаб қолди. Айниқса, сиёсий аъён ва аъёнчаларимизда. Унинг ишдаги камчилигини айтсанг "бу мақолани душманларим заказ қилган, мени кўролмаётир" деб гап чиқарадиганлар кўпайган бугун.

Танқидни кўтармаслик, бугунги замонга мослашолмаслик, албатта, раҳбар одамлардаги катта қусур.

"Заказ мақола", "кимдир обрўйимни тўкмоқчи" деган баҳоналар ўтди. У хў, ўша ёпиқ замонларда ишлаши, фойда бериши мумкин эди. Бугун кимнинг ёки қайси идора ёки ташкилотнинг қандай ишлаётганини ҳамма кўриб, билиб турибди.

Шунинг учун ҳурматли акахонлар, бундай баҳоналарни рўкач қилишни, йўқ нарсалар ҳақида ўйлашни ва бошқаларниям шунга ишонтиришга уринишни бас қилайлик. Уялайлик. Сиз Афлотун ёки Ротшильдмидингизки, одамлар сиз ҳақингизда мақола ёздиришга пул сарфласа, калласини қотириб яширин режалар тузса...

Одамни бундай кулдирманг. Хуллас, ўзимизни таҳлил қилишни, ўзимизга танқидий қарашни ўрганайлик. Ҳамма нарсани "заказ мақола" деб юмалоқ ёстиқ қилишни бас қилайлик.
@platformauzb