2022-12-03 21:59:13
Meni borimcha yaxshi ko'rishlarini xohlayman. Ba'zida qattiq gapirishim, sovuqqonligim bilan. Ko'chada osmonga qarab yurishim, qayrilib hech kimga qaramasligim bilan. Birinchi marta ko’rganda, gerdaygan, mensimaydigan degan taassurot qoldirishim bilan.
Borimcha qadrlashlarini xohlayman. Aslida judayam dangasaligim, lekin o'zim yaxshi ko'rgan ishlarni ko’zim yonib, energiya bilan bajara olishimga ko'z yumib. Atrofimdagi insonlarni ham o’zimga o’xshatib olishim, o’zimdagi pozitivlikni, energiyani ularga ham o’tkazib qo’yishim, qiziqmaydigan narsalariga ham qiziqtirib yuborishim bilan
Borimcha sevishlarini xohlayman. Injiqligim, qaysarligim, o'zim ham nimani xohlayotganimni bilmay qolishim, 2 daqiqa ichida o'zgaradigan xohishlarim, ushalmasdek ko'rinadigan orzularim, vaqti kelsa tinch joyda maza qilib suhbatlashib o'tirishdan ortig'ini xohlamay qolishim bilan
Borimcha qabul qilishlarini xohlayman. Ba'zida g'alati fikrlashim, kayfiyatsiz bo'lib qolishim, shuni deb muhim ishlarimni ham ortga surib yurishim, imtihonga qizg’in tayyorlanishim kerak bo’lgan bir paytda xayol surib qolib ketishim bilan
Borimcha yoqtirib qolishlarini xohlayman. Tashqaridan sovuq ko’ringanim bilan ichimda iliq tuyg’ular borligi, ba’zida o’zimni bee’tibor tutganim bilan aslida unday emasligi, o’zimni sevishim lekin xudbin emasligim, o’zimni ishimni tezroq va puxta bitirishim lekin boshqalarga yordam berishdan rohatlanishim bilan
Borimcha yaxshi ko’rishlarini xohlayman. Pozitivligim, ko’p kulishni yaxshi ko’rishim, vaziyatlarni yengil qabul qilishim, drama yasamasligim, bekorchi narsalarga e’tibor bermasligim, ikkiyuzlamachilik, aktrisalik qila olmasligim, hayotning har bir lahzasidan lazzatlanib, maza qilib yashashga harakat qilishim, o’zimni qiynashni yomon ko’rishim bilan.
Borimcha yaxshi ko'rib, menga intilishlarini xohlayman. Doim go'zallikni yaxshi ko'rishim lekin doim ham go'zal bo'la olmay qolishim bilan. Yaxshi kiyinishni, yaxshi ovqatlanishni, yaxshi joylarga borishni, o’zim uchun ayamasdan pul sarflashni sevishim bilan.
Qishda muzqaymoq yeyishim, “Bounty”dan boshqa shokoladni yoqtirmasligim, socially active, publicly available bo’lishni sevishim, odam ajratmasdan hamma bilan gaplashib ketishim, o’zimni mustaqil ko’rsatganimga qaramasdan aslida himoya muhtoj oddiy qizligim bilan, o’zgartirishga harakat qilmasdan, borimcha yaxshi ko’rishlarini xohlayman.
Olindi
10 viewsedited 18:59