Болалар агрессияси! Ота ва она нима қилсин? Фарзандингизнинг | Zebiniso Ahmedova — psixolog blogi

Болалар агрессияси! Ота ва она нима қилсин?

Фарзандингизнинг жахлдорлиги ва агрессияси қаердан ҳам келарди? Оиланинг ичидаги носоғлом муҳитни, жанжални, бир-бирини тушуна олмасликнинг боладаги кўриниши болалар агрессиясидир. Фарзандингизда асабийлик ва агрессив ҳолат пайдо бўлдими, қуйидаги маслаҳатларга амал қилинг:

1. “ЙЎҚ!” дейишни камайтиринг. Бир марта йўқ дейишдан олдин икки марта “Ха!” деб унга эркинлик беришингиз керак. Масалан: “Қўй деяпман сенга! Уйда сакрама!” ўрнига “Ҳозир хонангдаги ётоғингни тўғрилашдан олдин мазза қилиб сакраб оласан!”. Бунда болангизнинг сакраш эҳтиёжини қондираяпсиз ва яна бу сакраш учун бирор масъулият бераяпсиз.

2. Оиланинг фикри бир бўлиши керак. Агар ота фарзандга бирор танбех берса ва талаб жорий қилса, бу “қонунни” буви ёки бобо ўзгартириб қарши чиқмаслиги керак. Катталарнинг бир бировларига қарши чиқиши фарзанднинг ҳам катталарга қарши чиқишига йўл очиб беришдир.

3. Фарзанд олдида тортишиш, жанжаллашиш, бир бировини хақоратлаш мумкин эмас. Ўзингиз оилада сокин мухит пайдо қиласиз шунда фарзандингиз ҳам сокинликни пайдо қилади.

4. Фарзандингизни бошқалар билан солиштирманг. Бошқа оиладаги мухит сизнинг уйингиздаги муҳитдан яхшилигини ва уларнинг боласи ҳам сизнинг фарзандингиздан яхшилигини уқтираверсангиз, фарзандингиз уйдан қочиб кетади.

5. Фарзандингизни бировни ураётганлигини кўриб қолсангиз, болангизнинг қўлини ушлаб ўша урган жойини силаб қўйишни ўрганинг ва ўргатинг. Шунда болангизда сизга ва бошқаларга нисбатан рахм туйғуси шаклланади. Калтаклаш эса берахм бола тарбиялашдир.

6. Жахл хиссиётини фикрга айлантириб сизга айтиб беришига эришинг. “Менинг жахлим чиқаяпти, чунки менга рухсат бермаганингиз ёқмади шекилли” дея ўзини тушуниб олишини ўргатишингиз керак. Ўзини тушуниб олмасдан фарзандини калтаклаган ота ёки она агрессиясини жиловлай олмайдиган инсон тарбиялайди. Жахлингиз чиққанида йигирма марта чуқур нафас олиб чуқур нафас чиқаринг ва фарзандингизни ҳам шу машқга ўргатинг. Жахлингиз чиқганида ўтириб туриш машқини бажаришни бошланг бу сизга ва фарзандларингизга “менинг жахлим чиқаяпти” деган сигнал вазифасини бажарсин.

Фарзандингизнинг жахли чиқганида ҳам ўтириб туриш машқини бажаришга ўргатинг.

Бола агрессияси қаердан пайдо бўлади ва унинг фойдаси борми?

Фарзанд ўз фикрини айтишни истаганида ва бу фикрни тўғри айтиб бера олмаганида агрессив йўл билан билдиради. Демак, агрессия ўзини ҳимоя қилиш, фикрини қарорини билдиришнинг актив кураш усулида билдириш экан.

Агрессив хатти ҳаракат ва агрессив нутқ орқали бола ўзини ҳимоя қилмоқчи бўлар экан.

Катталар боланинг агрессив холатида нима қилиши керак?

Фарзандингизнинг жахли чиқса, сиз ҳам унга қараб бақириб юборсангиз, демак, сиз агрессив одамлар билан урушиб қолишни ўргатаяпсиз болангизга. Аввал бақириб сўнг афсус қилиб ўтирсангиз ва сўнгра болангизга мехр берсангиз, демак, онани бақиртириш ва ундан кейин меҳр олиш мумкинлигини тушунади болангиз.

Фарзандингиз сиз каби агрессияни жиловлашни билмаётган бўлса, демак, сизга ва сизнинг оилангизга психолог ёрдами керак экан.

Бола агрессивлигида психолог ёрдами аввало ота ва онасига сўнгра шу фарзандга ҳам берилиши керак.

Психолог Зебинисо Ахмедова ва унинг жамоаси сизнинг фарзандингизда пайдо бўлган агрессив хулқ атвор билан ишлашга тайёр.

Зебинисо Аҳмедованинг «Фарзанд тарбияси учун” китобидан лавҳа.

Психологдан Консультация олиш учун, Ваҳима, қўрқув, ёпишқоқ фикр, хавотир ва невротик депрессияларда бизга мурожаат қилинг!
Тел: +998908055580
Тел: +998909444612

Расмий каналга
уланиш:
» @ZebinisoPsixolog

» Инфо канал | » Инстаграм саҳифа