ВОЯГА ЕТМАГАН БОЛАЛАРНИ ФАРЗАНДЛИККА ОЛИШ Вояга етма | "YORQIN HAYOT" GAZETASI

ВОЯГА ЕТМАГАН БОЛАЛАРНИ ФАРЗАНДЛИККА ОЛИШ
Вояга етмаган болаларнинг ҳуқуқ ва манфаатларини таъминлаш учун уларни фарзандликка олишга йўл қўйилади. “Бола манфаатлари” дейилганда биринчи навбатда унинг жисмоний, руҳий ва маънавий ривожланиши учун тўлақонли шароит яратиш тушунилади.
Фақат вояга етмаган болалар, яъни 18 ёшга тўлмаган болалар фарзандликка олиниши мумкин. Ўзбекистон Республикаси Фуқаролик кодексининг 28-моддасида назарда тутилган тартибда эмансипация қилинган шахслар фарзандликка олиниши мумкин эмас..
Фарзандликка олиш – бу ўзганинг фарзандини ўз фарзандига тенглаштириб олишдир.
Фарзандликка беришда аввало боланинг манфаати кўзланади.Фарзандликка бериш масаласини ҳал қилишда фарзандликка олувчининг шахси, унинг ва у билан бирга истиқомат қилувчи оила аъзоларининг соғлиги, оилада қарор топган қадриятлар, ўзаро муносабатлар, оила аъзолари билан бола ўртасида бўлажак муносабатлар, шунингдек фарзандликка олувчининг моддий жиҳатдан таъминланганлик даражаси ва турар-жой шароити ҳисобга олинади.
Фарзандликка олиш сир сақланади.
Ота-онанинг ўз болаларини тарбиялаш, уларнингсоғлиғи, жисмоний, руҳий, маънавий камолоти ҳақида ғамхўрлик қилишлари тўғрисида қонунда белгиланган мажбуриятлари фарзандликка олинган бола тарбиясини ихтиёрий равишда ўз зиммасига қабул қилган фарзандликка олувчиларга тўлиқ юкланади.
Бола фарзандликка олингунга қадар боқувчисини йўқотганлиги учун пенсия олаётган бўлса ёки унинг ота-онаси бола фарзандликка олингунга қадар вафот этган бўлса ҳам боқувчисини йўқотганлик учун пенсия ёки нафақа олиш ҳуқуқини сақлаб қолади. Фарзандликка олинган боланинг туғилишини қайд этиш дафтарига зарур ўзгартиришлар киритилган кун фарзандликка олишнинг вужудга келган вақти ҳисобланади.
Тўхтамурод РАЖАПОВ,
Фуқаролик ишлари бўйича туманлаараро суди раиси. https://t.me/yorqin_hayot1