Umr Falsafasi — Telegram kanal

Chiroyli aldading, go‘zal aldading,
Olovli so‘zlarga aldandi yurak,
To‘g‘risini aytsam "SEVGI"  bobida,
Sendek usta aktyor bo‘lmasa kerak.

Quroling she’r sening, ovozing paykon,
Taslimlikdan boshqa qo‘ymaysan chora.
Hali rollaringni ko‘rgan har inson,
O‘lib-tirilishga mahkum ko‘p bora.

Taxsinga loyiqdir bunday tomosha,
Ofarin!
Qarsaklar,  olqishlarni ol,
Pardaning ortiga o‘tasan shosha,
Men so‘ngi qatorda o‘tiribman, lol.

Oshiqlar roliga boshqa yo‘q nomzod,
Senchalik qotirib o‘ynamas hech kim.
Sen qo‘ygan bu sahna atalsa hayot,
Men unda kichkina  ko‘rinish edim...

Malika Salimova

@Umr_Falsafasi

Hech kimsaga yomonligim yo'q,
Kim kimligin Xudo biladi.
Hamma meni yomon ko'rsa ham,
Opam meni yaxshi ko'radi…

Qodir Qaxxor
Feruzabonu

@Umr_Falsafasi

Shundoq ham gunohim keragidan koʻp,
Qalbimdan u bandang ismini oʻchir…
Eslamay qoʻygandim ammo shu bugun,
Xudojon, men uni sogʻindim kechir…

Yasemin
Saadiya Ikramovna

@Umr_Falsafasi

Ona ulgʻayganga oʻxshayman chogʻi,
Jimgina hayolga choʻmib qolyapman.
Goʻyo sinovlarning yoʻqdir adogʻi,
Dardlarim ichimga koʻmib boryapman...

Yasemin
Saadiya Ikramovna

@Umr_Falsafasi

Kel, barini boshlaymiz boshdan,
Qo‘y, qiynadik ko‘ngilni g‘ashlab.
Va yurakni yasatib toshdan.
Bu safar men ketaman tashlab.

Sen bo‘lasan bu safar majnun,
Hijron seni tutadi o‘qqa.
Men bariga yasayman yakun,
Chiqaraman barini yo‘qqa!

Kel, boshqatdan boshlaymiz...
Bu gal,
Chin sevasan, men esa yolg‘on.
Sen bo‘lasan yo‘limga mahtal,
Men bo‘laman dimog‘i osmon!

Va bu safar sevdirgunimcha,
Poyinga gul tashlayman to‘shab.
Yonganmidim sen deb ozmuncha,
Joni tekin telbaga o‘xshab?!

Endi kelsin senga ham navbat,
Shunday sevki, chidab bo‘lmasin!
Menga o‘yin bo‘lsin muxabbat,
Senda boshqa chora qolmasin!

Kel, booooshidan boshlaymiz,
Keyin,
Shirin so‘zlab seni etgum rom.
So‘ng mehrsiz qo‘yib atayin!
Seni barbod qilay batamom!

Ko‘ngil shaxring darvozasin och,
Oq bayroqni qo‘y baland ilib.
Keyin mayli qayga qochsang, qoch,
Eng rahmsiz yovligim bilib!

Kel, boshidan boshlaymiz,
Qo‘rqma,
Men senchalik vahshiy emasman!
Tashlab ketsang o‘laman dema,
Men qon ichib, yurak yemasman!

Men senchalik vahshiy emasman!

Malika Salimova

@Umr_Falsafasi

#Mulohaza

Qiz bolaning qismati
Qiz bolaning qismati palaxmonga o‘qmidi,
Dada sizga sotgani boshqa narsa yo‘qmidi,
Ranjitdimmi sizni yo ozorlarim ko‘pmidi,
Dada sizga sotgani boshqa narsa yo‘qmidi.

Jonimsan jonim bolam deganingiz yolg‘onmi,
Jonni boshqa qo‘llarga berish shuncha osonmi,
Taqdirning bozorida qizning narxi arzonmi,
Dada sizga sotgani boshqa narsa yo‘qmidi.

Ko‘zingiz qarog‘ida gavhar kabi o‘sgandim,
Keng hovlining quchogida javxar kabi o‘sgandim,
Akamlardan ortiqroq men nima so‘ragandim,
Dada sizga sotgani boshqa narsa yo‘qmidi.

Yig‘lasam kuz yoshimga bardoshingiz yetmasdi
Siz rozi bo‘lmasangiz meni olib ketmasdi.
Qalin pulni ko‘p bergan qudangiz kutmasmidi
Dada sizga sotgani boshqa narsa yo‘qmidi.

Yot uyida begonaman duoyingiz hamrohim,
Meni yillab mehmon qilgan mezbonim dadajonim,
Yuragimning bir chetida turibdi bitta ohim,
Dada sizga sotgani boshqa narsa yo‘qmidi.

@Umr_Falsafasi

Oradan ozgina vaqt o‘tsa bo‘ldi,
Yodimdan mutlaqo o‘chsang ham  kerak!
Bechora yuragim zardobga to‘ldi,
Bir oz chidab bersa bo‘ldi shu yurak!

Kunlarim osuda, tunlarim sokin,
Boshimga qulab ham ketmadi falak!
Men hali sevib ham qolishim mumkin,
Bir oz chidab bersa bo‘ldi shu yurak!

Har ishda xayr bor, har ishda hikmat,
Balki ketishlaring baxtimdan darak!
Ustingdan Xudoga qildim shikoyat,
Bir oz chidab bersa bo‘ldi shu yurak!

Sen esa, kimlardan kechganingni bil,
Mendek yonib oshiq bo‘lar qay malak?!
Sendan yomon qoldi, ishonsang, ko‘ngil,
Bir oz chidab bersa bo‘ldi shu yurak!

Oradan ozgina vaqt o‘tsa bo‘ldi,
Yodimdan mutlaqo o‘chsang ham  kerak!

Malika Salimova

@Umr_Falsafasi

Azoblar yurakka tig‘ joylaganda,
Raqiblar tinmayin yo‘l poylaganda,
Tuhmatlar ortingdan musht shaylaganda,
Samimiy kulishni o‘rganish kerak...

Ortingdan quvlashib yetsa mish-mishlar,
Tomog‘ingdan oshib ketsa tashvishlar.
Oyog‘ingni zanjirband etsa yumushlar,
Indamay yurishni o‘rganish kerak...

Do‘stlaring sotsalar og‘ir damingda,
Bir suyanch bo‘lmasa biror kamingda.
Og‘irroq xastalik bo‘lsa taningda,
Sabr-la ko‘nishni o‘rganish kerak...

Davlating bo‘lmasa orzuga loyiq,
Biror yumushinga kulsa xaloyiq.
Ro‘zg‘or ummonida bo‘lmasa qayiq,
Noiloj suzishni o‘rganish kerak...

Oqil bo‘lmasa gar umr yo‘ldoshing,
Farzand xatosiga egilsa boshing,
Behuda oqmasin ko‘zingda yoshing,
Taqdirga ko‘nishni o‘rganish kerak...

Bahorni sevsang-u qish kirib kelsa,
Shabboda o‘rnida izg‘irin yelsa.
Bulbullar o‘rnida qarg‘alar kulsa,
Qadriga yetishni o‘rganish kerak...

Oy kuning sanog‘i oxirga yetsa,
Ruhing vujudingni tark etib ketsa,
Sirotda Payg‘ambar qo‘lingni tutsa,
Indamay o‘lishni o‘rganish kerak...

@Umr_Falsafasi

Ona bor dunyoda yashash boshqacha,
Onani ta’rifi, mehri boshqacha.
To‘lsa hamki xatto to‘qson yoshgacha,
Ona bor hayotda yashash boshqacha!

Yashaydi onamiz bizlarni o‘ylab,
Tunu kun Xudodan baxtimiz so‘rab.
Onasiz qolganlar to‘ymaydi yig'lab,
Ona bor dunyoda yashash boshqacha!

Odamda martaba obro‘ bo‘lsa ham
Qo‘llida millionlab puli bo'lsa ham.
Yonida otasi hayot bo‘lsa ham,
Ona bor hayotda yashash boshqacha!

Onalar doimo xurmatda bo'lsin,
Farzandin baxtini albatta ko‘rsin.
Yetimlik dardini azobi qursin,
Ona bor hayotda yashash boshqacha!

Yetimlik dardini yetim biladi,
Uning bu dunyosi bir kam bo‘ladi.
O‘zidan o‘tganin o‘zi biladi,
Ona bor dunyoda yashash boshqacha!

Onangiz umriga umr tilayman,
Bir umr tugalmas baxtni tilayman.
Onasi yo‘qlardan uzr so'rayman,
Ona bor hayotda yashash boshqacha!

Onam bor Allohga shukur qilaman,
Ularga ming bora ta’zim qilaman.

@Umr_Falsafasi

Ayolga berdilar bugun bir savol,
Dunyoda eng totli aytginchi darhol,
Novvotmi, oqqandmi, shakar yoki bol?
Bolamdan totlisi yo‘q dedi ayol!

Yana so‘radilar, aytgin yashirmay,
Eng xushbo‘y gul qaysi: atirgul, lola?
Bir lahzada berdi javob o‘ylamay,
Eng xushbo‘y xilqat bu shubhasiz bola.

Ayol borki bari, qiladi orzu,
Uy, boylik, taqinchoq, pari jamoli,
Qay birin xohlaysan, ayt sekin dedi:
Menga kifoyadir bolam kamoli.

@Umr_Falsafasi