2022-04-25 01:51:57
SOLIHIM
SOLIHAM
Abadiy birgamiz
Meni sevsang, Allohni sev.
Meni sevsangiz, Rasulullohga oshiq bo'ling...
4-QISM
Soliha shu dam juda baxtli edi. Ota-onasi yonida bo'lmasa-da, ularning o'rnini bosa oladigan mehribon tarbiyachisi, akasining o'rnini bosa oladigan Solih akasi bor edi.
---Allohimga shukur. Shu kunga yetkazgani uchun. Sog'lom qilib yaratgani uchun. Meni yolg'iz qoldirmagani uchun...
U yana har doimgidek bog'ga chiqdi. Gullariga qaradi. Odatda, bu payt Solih ham uning oldiga kelib, unga yordam beradi, ammo negadir u kelmadi. Soliha uni yigirma daqiqa kutdi, lekin undan darak yo'q edi.
Oxiri o'zi uning oldiga bormoqchi edi. Ichkariga kirarkan, tarbiyachisining ovozi va yana qandaydir ovozlarni eshitdi:
---Biz Solihni boqob olmoqchimiz. Juda namunali, aqlli bola ekan.
---Ammo Nazira pap, u Solihaga juda bog'lanib qolgan. Uni ham olib ketolmaysizmi?--- Solih va Soliha haqida hatto tarbiyachilar ham bilar, ularni ajratmaslikka harakat qilardi.
---Afsuski buning iloji yo'q. Turmush o'rtog'im juda obro'li va boy inson, ammo Xudo bizni farzamddan qisdi, shuning uchun bola boqib olish uchun shu yerga keldik. O'g'il farzand kelajakda otasining davomchisi bo'ladi.
---Ammo qiz farzand sizlarni Jannatga yetaklaydigan yo'l emasmi?
---Eee menga va'z o'qimang. Shundog'am sizdan ko'p narsani bilaman. Qiz bolani kelajakda boqish, uni o'qitish kerak. O'g'il farzand esa o'zini o'zi boqa oladi. Bizga qiz kerak emas.
---Ammo...
---Eshitmadingizmi? Menga Solihni olib chiqing!
Soliha chidolmadi. Otilib xonaga kirdi.
---Bermayman! Sizlarga akamni bermayman.--- u yig'lay boshladi. Uni ko'rib xonadagi barcha xodimlar ko'ziga yosh oldi.
--- Hoy qizaloq, sen kim bo'libsan-ki, biz sening aytganingni qilishimiz kerak?--- ayol Solihaga yaqinlashdi. Soliha qo'rqib ortiga tisarildi.
---Bermayman akamni! Ketinglar!
Ayol sal asabiy ekanmi, uning gaplariga qarab o'tirmadi. Sharta yuziga tarsaki tushirib yubordi. Soliha o'zi kichkina qizcha bo'lgani uchun bu bahaybat zarbadan uchib ketdi. Sho'rlik tarbiyachining esi chiqib ketdi.
---Bu nima qilganingiz? Hozir politsiya chaqirsam nima qila olasiz?
---Adashasiz. Hozir siz emas men politsiya chaqiraman. Menga xohlagan bolani bermayotganingiz uchun. Tez Solihni olib chiqing! Men kutishni yoqtirmayman.
Tarbiyachi noiloj Solihning xonasi tomon yo'l oldi. Soliha ham uning ortidan yugurdi.
---Opajon, jon opajon, Solih akamni berib yubormaymiz, to'g'rimi? Ular men bilan qoladilar a?--- tarbiyachi Solihaning iltijo va yoshli ko'zlariga qarolmadi.
---Albatta qizim. U biz bilan. U doik sening yoningda bo'ladi.
Ular Solih o'tirgan xonaga kelishdi. Atrofda bolalar o'yin-kulgu qilar, bir-biri bilan janjallashar, Solih esa qo'liga kitob olib namoz o'qishni o'rganayotgandi.
---Auzu... Auzu billahi... Nima edi-ya. Yana esimdan chiqdi...--- Soliha uni ko'rib yig'lab yubordi va uning oldiga yugurib bordi.
---Akajon! Akajon, qarang sizni olib ketishyapti. Men bilan qoling Iltimos.
---Nima?--- Solih hayron bo'lib tarbiyachisiga qaradi. Uning ko'zidagi mungdan hammasini tushundi.--- hammasi yaxshi bo'ladi Soliham. Men hech qayerga ketmayman.
Ular uchcovlari birgalikda qabulxona taraf yo'l oldilar. Solihni ko'rib haligi ayol uning oldiga yugurib keldi.
---Voy o'zimni asal o'glimdan. Yur men bilan. Men endi sening oying bo'laman.
Mehribonlik uyida yashaydigan bolalar uchun odatda bu so'zlar orzu bo'ladi va ular ota-onalari bo'lishi uchun astoydil harakat qiladilar, ammo Solih bu yerdan ketishni xohlamasdi. Solihasini tashlab ketolmasdi.
---Men ketmayman,--- erga qarab javob berdi u.
---Voy o'g'lim, nega ketmaysan? Biz hashamatli, juda katta uyda yashaymiz. Senga nima so'rasang ham olib beraman.
1.8K viewsحب , 22:51