She'r sehri

2022-08-23 07:16:59 Эҳром қураётган қуллардек ҳордим,
Кунларни ютмоқлик оғир тобора.
Елкадаги юкка чидамоқ мумкин,
Кўзлар оғирлашса топилмас чора...

Тангасин йўқотиб қўйган боладек
Ўксинаман ерга нигоҳим тикиб.
Бу дунё борича одамларгадир,
Фақат ўша танга эди меники...

Қачондир чинакам яшагим келар...
Ҳаёт - тирикликка берилган ваъда.
Йилларда яшашга ишониш қийин,
Яшамоқ мумкиндир фақат лаҳзада...

Шуҳрат Ориф

@shomuz - Yo‘limiz bir! Ochish/sharhlash

2022-08-22 15:33:45 ҚАЛДИРҒОЧНИНГ КЎЗЁШЛАРИ
(таржимаи ҳолим)

Мен
Қабрда туғилган Гўрўғли эдим,
Зулмат йўргаклаган Нурўғли эдим,
Икки жаҳон аро Йўлўғли эдим...

Мен
Қизғин қизғалдоқлар кафтида ўсдим,
Ёнаётган музнинг тафтида ўсдим,
Бир жуфт кабутарнинг кифтида ўсдим...

Мен
Ризқ гуллаган дала бўйида эдим,
Қанот ёзган ялпиз бўйида эдим,
Висол ва Ҳижроннинг тўйида эдим...

Мен
Қалдирғоч қўрғонин меҳмони бўлдим,
Адашган мусофир армони бўлдим,
“Бор экан, йўқ экан” достони бўлдим...

Мен
Битта боларига толиб тушибман,
Кўҳна бир тандирга қолип тушибман,
Ўз-ўзимга мағлуб – ғолиб тушибман...

Мен
Махлуқдан малаклик изладим кўпроқ,
Қошимда Инсондай гуллади тупроқ,
Қўлим қанот бўлди, кўзларим чироқ...

Мен
Булбул ўқиётган китобни кўрдим,
Гўдак кулгусида хитобни кўрдим,
Шамолни ияртган шитобни кўрдим...

Мен
Қақраган чўл эдим, чин дарё бўлдим,
Бўм-бўш осмон эдим, ўзимга тўлдим,
Ерга жилғаларни етаклаб келдим...

Мен
Билдим руҳ рўёмас, қон ҳам эмас жон,
Кўзёшлар сув эмас, нон эмас виждон,
Одам ҳеч эт эмас, ҳокмас бу жаҳон!

Мен...

Эшқобил Шукур

@sherSehri Ochish/sharhlash

2022-08-22 06:36:05 * * *

Сен ҳам эслайсанми гоҳ қолиб ҳоли,
Қўмсайсанми кўнгил кўчаларини…
Мунаввар айлади ойдин хаёлинг
Савдоли бу умрим кечаларини!

Сен ҳам эслайсанми ёшлигингни — шаън,
Ранги, ифорини — нечук эди ул?
Мени маст қилади қирқ йил наридан
Китобинг қатига қистирилган гул…

Обу оташидан дунёни ўтдинг,
Бекарам, бир кам деб қарғарсан ёмон…
Севги-чи, илк севги… наҳот, унутдинг,
Мен эса соғиниб яшайман ҳамон.

Номалар битардим сенга бир талай,
Қоғозга ишониб сирларнинг сирин.
Хатжилдни ёпардим ширачин ялаб –
Хатжилдлар ўзингдек, сўзингдек ширин!

Тонмайман бўғзимга ботса ҳам тиши,
Эслаб хўрсингулик ёзим, кишим бор.
Йўкдир дунёсининг мен билан иши,
Менинг бу дунёда йўқлар кишим бор!
Сен ҳам эслайсанми…

Муҳаммад РАҲМОН

@sherSehri Ochish/sharhlash

2022-08-21 23:33:07 ТАҚЛИД

Бу одам,
Бу омадсиз,
бу руҳсиз одам.
Кўнгли совуб кетган одам
Турмушдан,
Ишдан,
Ишқдан...

Увол тутган,
Қоқилган-сурилган,
Қарғиш ҳам урган –
Худо ургани етмагандай...

Худо уни шундай жазолаган:
Кўнглига қарамайди,
Йўлига қарамайди,
Умрига қарамайди,
Фақат соатига қарайди.

Ва яна
Туфлисини ялтиллатиб
Ҳар саҳар
Яна
Ишга кетади бу одам.

Дадахон

@dadaxonmuhammadiy Ochish/sharhlash