ШОИР Укаларимга...
Сўз яралмиш энг аввали,
Тоғларни Сўзла йиққанмиз.
Яратган Сўзга зор қилма,
Сўз излаб йўлга чиққанмиз!
Бир Сўзларки Ҳаққа етгай,
Сўзсиз дунё куйиб кетгай,
Ҳама кўклам томон кетгай,
Куз излаб йўлга чиққанмиз!
Яшарга юрт, ҳонумони,
Сўз ичинда ширин жони,
Еярга Сўз ошу- нони,
Туз излаб йўлга чиққанмиз!
Дунё-ю дун ухлар ҳали,
Дори уйғоқ Сўз осгали,
Дил доғига лаб босгали,
Муз излаб йўлга чиққанмиз!
Бизни қўлла илоҳий зот,
Сўзки йўқдан қилди бунёд,
Бизам бормиз, бизам барбод,
Ўз излаб йўлга чиққанмиз!
Самариддин Саййидзод
17.07.2022
@Sayyidzod
