Samariddin Sayyidzod

2022-08-29 23:20:57 Бизни шеър аталмиш Ишқ бирлаштиради...
Гоҳида ўйлаб қоламан Яратган Қашқадарёликларни зуваласини Сўз билан, Шеър ишқи билан қорганмикан деб...
Ўзимни юраги қайноқ ука сингилларим, Сиз менинг Сўз дунёсидан топган жавоҳирларим, мудом бор бўлинг!!! Қашқадарёни йўқлаб туринг!!!
Жонкуяр Устозлар Ўроз Ҳайдар, Нилуфархоним Умарова ҳамда Азизбек Норовларга Сўз дунёсига дахлдор эканлигимизни эслатиб тургувчи гўзал муждалар учун ташаккур!!!

@Sayyidzod Ochish/sharhlash

2022-08-17 19:46:05 #Ибрат

"Иккинчи жуфт" деб номланган Миср фильми атиги 4 дақиқа давом этади ва Миср кинофестивалида энг яхши қисқа метражли фильм мукофотига сазовор бўлди.

@Sayyidzod Ochish/sharhlash

2022-08-09 16:54:00 #Мен_севган_шеър...

"Яна бу шаҳарда келдик юзма-юз,
Наилож, бошқа бир шаҳаримиз йўқ.
Балки биз бахтиёр бўла олардик,
Эҳтимол, бахтлимиз, хабаримиз йўқ..."

Рамиз Равшан

@Sayyidzod Ochish/sharhlash

2022-07-22 04:21:32 Madinada Tonglar Otdi... Borolmadim...

video va audio Muallif:
@Innal_Muslim

@Behuda_Umr Ochish/sharhlash

2022-07-20 07:29:39 * * *

Туннинг сочларига оралади оқ,
Уфқда энг сўнгги юлдузлар сўнди.
Ой — терак учида хира шамчироқ,
Ариқлар лабига шабнамлар қўнди.

Ҳорғин сўриларда кетган пинакка,
Адирлар ортини туш кўрган кетмон.
Бу тун — ой, далани суғориб якка,
Саҳар елкасига бош қўйган деҳқон.

Энди ҳовлилардан ўрлайди тутун,
Кимдир ташвишларин қалар ўчоққа.
Ҳаволаниб турган райҳонлар ҳидин,
Ел кўтариб кетар қўшни чорбоққа.

Боғлар — девор оша мингашган жийда,
Йўллар япроқларга минг йиллик сирдош.
Тоғлар ортидаги олтин водийда
Бокира бир тонгни йўргаклар қуёш.

Борлиққа бўй тарар нурлар оҳанги,
Ой ботган сой томон ошиқар сўқмоқ.
Хивчин саватларда осилган тонгги
Сутлар ҳовуридан оқарар қишлоқ.


* * *

Август сув тарайди яйдоқ далага,
Ҳориб қайтган чўпон сурувин қамар.
Осмон чодир ёяр ой машъалага,
Соялар оқ туннинг чопонин ямар.

Олислардан кела бошлар тўйхатлар,
Ишкомларга ўзин осади самар.
Дил розига тўлар кентлар, пойтахтлар,
Умид улғаяди қабрингга қадар.

Ишққа сирдош ёлғизоёқ сўқмоқлар,
Чирилдоқлар туннинг жонини ёқар.
Теракзорда чапак чалар япроқлар,
Ариқларда қирмиз олмалар оқар.

Еру- осмон гувоҳ, ҳар зарра уйғоқ,
Полизларда шўх ел қовун ёради.
Август...
Топ- тоза тун...
Ва тоза гуноҳ,
Сени Худовандга олиб боради.

Самариддин САЙЙИДЗОД Ochish/sharhlash

2022-07-20 07:29:39 #Таваллуд_кун
#Воҳамиз_ижодкорлари

20 июль - Ўзбекистон Ёзувчилар уюшмаси аъзоси, шоир Самариддин Саййидзод таваллуд топган кун.

Самариддин Саййидзод 1986 йил Чироқчи туманида туғилган. Қарши давлат университетини тамомлаган. 2009 йилда "Ой камалаги" шеърий тўплами нашр этилган. Шеърлари турк, озарбайжон ва қозоқ тилларига таржима қилиниб, мазкур давлатларнинг адабий наршларида эълон қилинган. "Келажак овози" республика истеъдодли ёшлар танлови ғолиби. Ҳозирда таълим ва маданият соҳасида фаолият олиб бормоқда.

Ўзбекистон Ёзувчилар уюшмаси
Қашқадарё вилоят бўлими Ochish/sharhlash

2022-07-18 05:02:51 ШОИР Укаларимга...

Сўз яралмиш энг аввали,
Тоғларни Сўзла йиққанмиз.
Яратган Сўзга зор қилма,
Сўз излаб йўлга чиққанмиз!

Бир Сўзларки Ҳаққа етгай,
Сўзсиз дунё куйиб кетгай,
Ҳама кўклам томон кетгай,
Куз излаб йўлга чиққанмиз!

Яшарга юрт, ҳонумони,
Сўз ичинда ширин жони,
Еярга Сўз ошу- нони,
Туз излаб йўлга чиққанмиз!

Дунё-ю дун ухлар ҳали,
Дори уйғоқ Сўз осгали,
Дил доғига лаб босгали,
Муз излаб йўлга чиққанмиз!

Бизни қўлла илоҳий зот,
Сўзки йўқдан қилди бунёд,
Бизам бормиз, бизам барбод,
Ўз излаб йўлга чиққанмиз!

Самариддин Саййидзод
17.07.2022

@Sayyidzod Ochish/sharhlash

2022-07-17 17:19:57 * * ***

Менинг ётар юртим- осойиш тепа,
Қадим дарёларнинг туташган жойи.
Тун тоғлар бошига тикканда капа,
Шом қўйиб юборар, баркашдек ойин.

Кўкгумбаз масжидлар тоқида аъзон,
Кешнинг кенгликлари бир беҳишт каби.
Тоғларнинг, боғларнинг аксида осмон,
Кезинар жаннатга етгандек Набий.

Ёдларда ёз ёрқин, ҳандалак бўйли,
Шамолларнинг олма узиб қочгани.
Ўн саккиз баҳор бор ҳижронли, тўйли,
Бир тотли сирим бор, сенга очгали.

Менинг ётар жойим, осойиш тепа,
Шабнамзор тонгларни сарпойчан кездим.
Туманли тоғларга боқиб ҳар сафар,
Ўзимни бахтиёр ҳоқондек сездим.

Балки йўқлаб турар бир шеърий нафас,
Дарвозамни қоқиб келар дўстларим.
Менинг жон азамга капалак нусха,
Бўйинбоғин тақиб келар дўстларим.

Олисларда кимдир умримни элар,
Элин ортга ташлаб кетмаган шоир.
Минг йилда бир марта дунёга келар,
Тошкентга оёғи етмаган Шоир...

Самариддин Саййидзод

@Sayyidzod Ochish/sharhlash

2022-07-15 06:11:16 * * ***

Дунёни топширайлик болаларга, ҳеч бўлмаса бир кунга,
Ол алвон бир шар каби берайлик ўйнасинлар.
Ўйнасинлар қўшиқлар куйлаб юлдузлар орасида.
Дунёни болаларга тошпирайлик.
Улкан бир олма каби, топширайлик иссиқ бир нон каби,
Ҳеч бўлмаса бир кун тўйсинлар.
Дунёни болаларга топширайлик.
Бир кун бўлса ҳам ўргансин дунё йўлдошликни.
Болалар дунёни олажак қўлларимиздан,
Ўлимсиз дарахтлар экажаклар.

Нозим Ҳикмат

@Sayyidzod Ochish/sharhlash

2022-06-28 15:03:13 Тонгга яқин

Ой тун бўйи май қуйиб тутди,
Борлиқ ютди алвон қадаҳни.
Маст ел шохин силкитиб ўтди,
Олмаларин отди дарахтни.

Бир зум тиниб қолди сўқмоқлар,
Чигирткалар кўз ёрар бир кез.
Июннинг оқ ойдин тунида
Ёз сайр этар,
Ялангбош...
Енгсиз...

Ўз қонига ботди бир сопол -
Ой бўлмади ярқироқ тошлар.
Ҳар заррани уйғотди шамол,
Фақат тоғлар ётди ёнбошлаб.
Фақат тоғлар уйғонмай ётди...

Самариддин Саййидзод

@Sayyidzod
kanalga ulaning! Ochish/sharhlash