2022-06-09 10:50:13
Болалигимда хотирам яхши эди. Шеърларни бир-икки марта ўқишда ёд олардим. Шунчаки ўқиган шеъримни кейинги кунлари хотирамда сатрма-сатр тиклаб чиқардим. Бунинг ёмон томонлари ҳам бисёр. Масалан, кўп сўзлар, баъзан сатрлар “ўзгариб” кетар эди. Муаллифлар ёдимда қолмасди.
Журнал саҳифаларида ўқиганим ушбу хокку ҳам хотирамда шу тарзда қолиб кетган. Муаллифи, таржимонини эслолмайман. Балки хотирамда тиклай туриб жуда жиддий ўзгартириб юборган ҳам бўлишим мумкин. Аммо биринчи қатори ўзгармаган бўлса керак: “Ҳазиллашиб мен онамни опичлаб олдим”.
“Ҳазиллашиб мен онамни опичлаб олдим,
У шундай енгил эди-ки,
Томоғим ачишди”.
Учинчи сатр бутунлай бошқача бўлиши ҳам мумкин. Эҳтимол 1-2- сатрларда ҳам сўзлар алмашиб қолгандир. Назаримда бу муҳим эмас. Ҳар ҳолда мен учун. Муҳими санъат асари ҳиссиётларнинг бутун бошли гаммасини тақдим этади менга. Унинг 1-сатрини хаёлан кўп такрорлайман. Маъюс бир армон таъмини туяман. “Ҳазиллашиб мен онамни опичлаб олдим”, “Улуғ Тангрим Сени аччиқ соғиндим” билан бирга энг кўп хаёлимда айланадиган сатрлар бўлса керак. Расмана шеърият, бадиийлик меъёрлари билан баҳолаганда қандайлигини билмайман-ку, аммо ҳолатлар мен учун топилма. Топилмаки, ич-ичимда мавжуд, аммо ўзимга қоронғу бўлган. Топилмаки, кашф этилишига улкан эҳтиёж сезганман, кашф этгач бошқача одам бўлиб қолганман.
Кимнинг хоккуси эди бу, ким таржима қилган?
Сизда ҳам шунақа сатрлар борми ё мен бир ўзимми “шунақа”
Таҳрир:
Хокку эмас, танка экан. Муаллифи Ишикава Такубоку. Хуршид Даврон таржимаси.
Ҳазиллашиб
Мен онамни опичлаб олдим.
У шундай енгил эди-ки,
Уч қадам юрар-юрмас,
Йиғлаб юбордим.
744 viewsSanjar Nazar, edited 07:50