#psihogenetika Шунчаки, қараб туролмадим. Индульгенция- Ўрт | Dr. Gavhar Darvish (Psixoterapevt, Psixiatr, Narkolog, PhD)

#psihogenetika

Шунчаки, қараб туролмадим.

Индульгенция- Ўрта Аср бошларида католик черковларида жорий этилган амалиёт бўлиб, маълум бир тўлов ёки хақ эвазига одамларнинг гунохлардан поклангани хақида берилган гувохнома. Халқ орасида уни"Жаннатга йўлланма", деб хам аташган. Индульгенцияни пул ёки тўлов эвазига бериш 1567 йили Папа Пий V томонидан тақиқланган. Шундан кейин бандаларнинг гунохларини кечириш "қоғози"ни пулга сотиб олиш мумкин деган миш-мишларга бархам берилган.

Афсуски, хозирги кунда, ўзини мусулмон, тақволи, деб кўрсатаётган бир номутахасис псевдопсихолог томонидан Индульгенцияга ўхшаш, бир амалиёт жорий қилиниб, у тобора оммалашиб боряпти. Яъни, сиз мўмайгина пул бериб, генингизни авлод-аждодларнинг "гунохларидан", "кармалардан" тозалатасиз, ўша сохта мутахассисга "байъат" берасиз. Яъни хар ойда топадиган даромадингизнинг неччидур %ини олиб келиб берасиз. У эса, ишларингиз ривожи, саломатлинингиз, ва "рухий покланиб", гўёки жаннатга киришингизни ўз бўйнига олади.

Биринчидан. Исломда ота боболарининг гунохи генга ўтади, деган нарсанинг ўзи йўқ. Агар ота-онанинг гунохлари учун фарзандлар жавоб берганида, Абу Жахлнинг ўғли, Икрима розиаллоху анхуга тириклигида жаннат башорати берилмасди.

Иккинчидан. Карма сўзи психологиядан эмас, буддизм таълимотидан олинган. Яъни буддавийлик динида реинкорнация, қайта туғилиш тушунчаси бор. Бунда одамнинг олдинги ҳаётилари вақтида қилган гунохлари рухида карма бўлиб қолади. Шунинг учун аввал рухни кармадан тозаланади. Кейин ўзи хохлаган шаклда қайта туғилади. Бу таълимотнинг илмий психологияга алоқаси йўқ.

Учинчидан психогенетика фанида умуман карма ўрганилмайди. У илм гендаги психологик хусусиятларнинг қандай шарт шароитларда намоён бўлишини ўрганади

Яъни, биз юқорида тмлга олган "рухий покловчи" псевдоустозлар, псехогенетика, католиклик, буддизм ва исломдаги таълимотларни мутлақо бузиб, бир бирига қориштириб, ўзига эргашганларни йўлдан адаштиришяпти.

Энг ачинарлиси, уларнинг чиройли сўзлари, хар 2 гапнинг бирида, жаннатийларим, жаннатда кўришгунча, жаннатни соғинганлар каби сўзлари билан мусулмонларни энг эзгу ниятлари орқали манипуляция қилишлари.
Кўзингизни очинг. Бу нафақат инфоқаллоблик. Бу ундан хам аянчли холат.Инфоқаллоб, фақат пулингизни ўзлаштиради. Бундай қаллоблар эса, қалбингизни хам эгаллаб, эътиқодингизни хам бузади. Бора бора секталар бошлиғига ўхшаб, ўзига сиғинишга олиб келади. Ўзингизни, яқинларингизни қаллоблардан ҳимоя қилинг.

Sayyora Azlarova @Psixoterapevtuz