2021-02-16 08:25:44
Коронавирусга қарши ихтиёрий эмлаш бошланадиКеча Вазирлар Маҳкамасида Республика Махсус комиссиясининг навбатдаги йиғилиши бўлиб ўтди.
Йиғилишда бир гуруҳ Олий Мажлис Қонунчилик депутатлари ҳам иштирок этди.
Унда Ўзбекистонда коронавирусга қарши вакциналарни ишлаб чиқиш ҳамда аҳолини коронавирусга қарши оммавий эмлаш ишларини бошлаш ва ташкиллаштириш чоралари муҳокама қилинди.
Ўзбекистонда Инновацион ривожланиш вазирлиги бошчилигида Хитойнинг Zhifei Longcom компанияси билан ҳамкорликда ZF-2001 рекомбинант вакцинасининг 3-фаза клиник синов босқичи ўтказилмоқда. Ҳозирга қадар 3-фаза клиник синови доирасида 6697 та кўнгилли ҳамюртимиз вакцинанинг 1-дозаси билан эмланган бўлса, яна 1209 таси 2-дозани ҳам қабул қилганлар.
Клиник синовнинг дастлабки натижаларига кўра, вакцина қабул қилганлар орасида 1-даражали ножўя таъсирлар (аллергик реакция, бироз иситма чиқиши, бош оғриғи) 5 нафар шахсда кузатилган ёки 0.3%ни ташкил этган (солиштириш учун, бу кўрсатгич "Pfizer/Biontech"да 2-3.8%, "Сутник V"да эса 0.3-0.4%ни ташкил этган). 2- ва 3-даражали ножўя таъсирлар эса кузатилмаган.
Клиник синовнинг ижобий натижалари сабабли Инновацион ривожланиш вазирлиги Ўзбекистонда аҳолини эмлашда мазкур вакцинадан фойдаланишни ҳамда бунинг учун Махсус комиссия томонидан вакцинадан фавқулодда фойдаланиш учун рухсат (EUA) берилишини таклиф қилмоқда.
Агар махсус комиссия томонидан бундай рухсат берилган тақдирда, вакцина яратилишида ҳамкор томон сифатида Ўзбекистонга вакцина имтиёзли нархларда ва етарли қувватларда етказиб берилади. Шунингдек, мамлакатда вакцина ZF-UZ-2001 номи остида Ўзбекистон ҳукумати билан ҳамкорликда тижоратлаштирилиши режалаштирилмоқда.
Махсус комиссия раисига кўра, Хитой компанияси маҳаллий фармацевтика компанияларимиз билан ҳамкорликда ZF-UZ-2001 вакцинацини жорий йилда 300 млн. донагача ишлаб чиқиши ва етказиб бериши мумкин. Бу эса жорий йил охиригача мамлакат аҳолисини оммавий равишда эмлаш имкониятини яратади.
Шунингдек, комиссия раиси Халқаро Вакциналар Иттифоқи (GAVI) томонидан Ўзбекистонга 2.5млн. га яқин Astra-Zeneca вакциналарини бепул етказиб берилиши бўйича ҳам музокаралар якунланаётганини маълум қилди. Музокаралар якунига қараб, ушбу вакциналарнинг дастлабки 800 минг донаси жорий йилнинг март ойларида Ўзбекистонга келтирилиши кутилмоқда.
Ўзбекистонда биринчи навбатда ёши катта, сурункали касаллиги бор, фуқароларга биринчи хизмат кўрсатувчи соҳа ходимларини (шифокор, ўқитувчи, ИИО ходимлари ва ҳоказо) жорий йил охиригича коронавирусга қарши вакцина билан тўлиқ эмлаш режалаштирилган. Шунингдек,
ижтимоий ҳимояга мухтож, ёши катта ва аҳолини бошқа заиф қатламлари вакилларини вакцина билан эмлаш бепул тарзда яъни бюджет маблағлари ҳисобига амалга оширилиши кўзда тутилмоқда.Махсус комиссия томонидан аҳолини вакцина билан эмлашга кўрилаётган чора-тадбирлар ҳақида тез кунларда Қонунчилик палатасида депутатларга алоҳида ахборот бериши кутилмоқда.
@deputat_kusherbayev
1.3K views05:25
Н
