​​OʻTINCH Ayolning qalbiga yoʻl qidir sergak, Topgaysan – meh | Nodir Jonuzoq | she’r va shuur

​​OʻTINCH

Ayolning qalbiga yoʻl qidir sergak,
Topgaysan – mehringni xarita qilsang.
Birodar, boʻlgaysan chinakam erkak,
Uning bir armonin arita bilsang.

Ehtimol, sugʻorib kiprik gardini,
Qora qismatiga koʻngandir ayol.
Ehtimol, minaday xavfli dardini 
Koʻnglining tubiga koʻmgandir ayol.

Hushyor navkar kabi shay tursin yoding,
Pinhon hasratin top sinchi misoli.
Shunda osoyishta kechgay hayoting,
Shunda umring boʻlgay xatardan xoli.

Sokin tiynatiga boqmagil loqayd,
Balki yukin senga ortmaydi ayol –
Sen gʻaflat domida mudrab yotgan payt
Bagʻringda nogahon portlaydi ayol!

Bu bir oʻtinch, xolos, emas malomat,
Oʻrtamasin nozik xilqatni dardlar.
Xafaqon dunyomiz topgay halovat –
Ayollar qalbiga yoʻl topsa mardlar…

-------------------------

ЎТИНЧ

Аёлнинг қалбига йўл қидир сергак,
Топгайсан – меҳрингни харита қилсанг.
Биродар, бўлгайсан чинакам эркак,
Унинг бир армонин арита билсанг.

Эҳтимол, суғориб киприк гардини,
Қора қисматига кўнгандир аёл.
Эҳтимол, минадай хавфли дардини 
Кўнглининг тубига кўмгандир аёл.

Ҳушёр навкар каби шай турсин ёдинг,
Пинҳон ҳасратин топ синчи мисоли.
Шунда осойишта кечгай ҳаётинг,
Шунда умринг бўлгай хатардан холи.

Сокин тийнатига боқмагил лоқайд,
Балки юкин сенга ортмайди аёл –
Сен ғафлат домида мудраб ётган пайт
Бағрингда ногаҳон портлайди аёл!

Бу бир ўтинч, холос, эмас маломат,
Ўртамасин нозик хилқатни дардлар.
Хафақон дунёмиз топгай ҳаловат –
Аёллар қалбига йўл топса мардлар…


8.03.2023

@n_jonuzoq