​​8-MART Bayramda shart qoʻymoq tuyulgay erish, Lekin bugun b | Nodir Jonuzoq | she’r va shuur

​​8-MART

Bayramda shart qoʻymoq tuyulgay erish,
Lekin bugun baxtli boʻlishingiz shart.
Oshiqqa sharafdir dasta gul berish,
Muhabbat ayyomi –
Sakkizinchi mart!

Ayol tabassumi, qizlar kulgisi
Shabnamday sochilgay – qolmas dilda gard.
Yerdan quyosh qadar tutgay gul isi,
Nafosat ayyomi –
Sakkizinchi mart!

Goho mubolagʻa rost soʻzdan chinroq,
Bitta lutf tufayli arir yuzdan zard.
Siz – rizvon bogʻini yoritgan chiroq,
Zarofat ayyomi – 
Sakkizinchi mart!

Arazlab ketgan ters mehmon singari
Qalbingizni qaytib yoʻqlamasin dard.
Yalmogʻizni yenggay tong afsungari,
Matonat ayyomi – 
Sakkizinchi mart!

Aziz aka, uka, oʻgʻil, doʻstu yor –
Tegrangizda qalqon erur ahli mard.
Siz suygan arzanda jonlar baxtiyor,
Sadoqat ayyomi – 
Sakkizinchi mart!

Navoiydan oshib soʻz aytmoq qayda?!
“Jismni qil sadqa...” – buyurmish Hazrat.
Har kuningiz boʻlsin qayta va qayta 
Saodat ayyomi – 
Sakkizinchi mart!!

----------------------

8-МАРТ

Байрамда шарт қўймоқ туюлгай эриш,
Лекин бугун бахтли бўлишингиз шарт.
Ошиққа шарафдир даста гул бериш,
Муҳаббат айёми –
Саккизинчи март!

Аёл табассуми, қизлар кулгиси
Шабнамдай сочилгай – қолмас дилда гард.
Ердан қуёш қадар тутгай гул иси,
Нафосат айёми –
Саккизинчи март!

Гоҳо муболаға рост сўздан чинроқ,
Битта лутф туфайли арир юздан зард.
Сиз – ризвон боғини ёритган чироқ,
Зарофат айёми – 
Саккизинчи март!

Аразлаб кетган терс меҳмон сингари
Қалбингизни қайтиб йўқламасин дард.
Ялмоғизни енггай тонг афсунгари,
Матонат айёми – 
Саккизинчи март!

Азиз ака, ука, ўғил, дўсту ёр –
Тегрангизда қалқон эрур аҳли мард.
Сиз суйган арзанда жонлар бахтиёр,
Садоқат айёми – 
Саккизинчи март!

Навоийдан ошиб сўз айтмоқ қайда?!
"Жисмни қил садқа..." – буюрмиш Ҳазрат.
Ҳар кунингиз бўлсин қайта ва қайта 
Саодат айёми – 
Саккизинчи март!!

@n_jonuzoq