2022-11-22 08:36:08
“Ijtimoiy himoya yagona reyestri”ga kirganlar uchun qanday imtiyozlar bor? Kam ta’minlangan oilalarga davlat tomonidan bepul yoki imtiyozli shartlarda ko‘rsatiladigan ijtimoiy xizmatlar va yordamlardan foydalanish imkoniyatini beruvchi “Ijtimoiy himoya yagona reyestri”ga kirish uchun my.gov.uz orqali onlayn ariza yuborish mumkin.
Eslatma!
Mazkur xizmat orqali oilaga bolalar nafaqasi yoki moddiy yordam tayinlanmaydi. Bu qonunchilik hujjatlarida belgilangan xizmatlar va imtiyozlardan foydalanishda QR-kodga ega ma’lumotnoma berish uchun mo‘ljallangan.
Kam ta’minlangan oilalar bolalar nafaqasi yoki moddiy yordam olish uchun fuqarolarning o‘zini o‘zi boshqarish organlari (mahallalar)ga murojaat etishlari zarur.
“Ijtimoiy himoya yagona reyestri”ga kiritilgan oilalar quyidagi imtiyozlardan foydalanishi mumkin:
davlat maktabgacha ta’lim muassasalarida ota-onalar to‘lovidan ozod etish;
umumiy o‘rta ta’lim maktablarida darsliklar ijara to‘lovlaridan ozod etish;
umumiy o‘rta ta’lim maktablari o‘quvchilari uchun qishki kiyim-bosh berish;
ayrim fanlarni o‘qitishga ixtisoslashtirilgan umumiy o‘rta maktablar o‘quvchilarini ovqatlanish xarajatlaridan ozod etish;
san’at, musiqa maktablari, «Barkamol avlod» markazlari va boshqa maktabdan tashqari ta’lim muassasalarida o‘qish xarajatlaridan ozod etish;
kam ta’minlangan oilalarning nogironligi bo‘lgan a’zolarini protez — ortopediya moslamalari bilan ta’minlash;
ixtisoslashtirilgan tibbiyot muassasalarida bepul maxsus (ambulator yoki kunduzgi) tibbiy yordam ko‘rsatish bo‘yicha yo‘llanma (order) olish va boshqalar.
@MyGovUz | @eGovUz
3.5K views05:36