Muhammad Ali ijodi

2023-03-19 10:30:10 Дўстлар давраси

Умр ҳам бир жойга бориб қолмоқда,
Жарангли кечмоқда кўнгил наъраси.
Чунки сиз чорлайсиз бир чаман боғдай,
Дўстларим давраси, дўстлар давраси.

Душман ёвузлиги душманликданмас,
Дўстингдан айирар, усули шундоқ.
Сени зарра билиб этса хору хас,
Заррадан ҳам чоғроқ кўнгли бўлар тоғ.

Ишониб сирингни айтгувчи фақат,
Дўстлар борлигидан боши осмон бўл!
Дўстингдан топ, деган сўзга йўқ тоқат,
Дўст топ деб, дўст топ, деб юрган инсон бўл!

Севги ўтар кетар, кетар мансаб ҳам,
Ёшлик ҳам мункиллар бир куни ҳолсиз.
Фақат дўстлик билан боқий бу олам,
Дўстлик қаримайди дунёда ёлғиз!..

Муҳаммад Али

@muhammadaliijodi Ochish/sharhlash

2023-03-18 09:10:25 Умид

“Кўнгил!” - дедим, кўнгил кўнмайдир,
“Унгил!” - дедим, тилак унмайдир.
Шахтим қайтди, эҳтимол шахтим,
Аммо умид сўнмас, сўнмайдир!

Муҳаммад Али

@muhammadaliijodi Ochish/sharhlash

2023-03-17 06:49:30 Қадимги нақл

Иш беради ҳамиша ақл:
Асли боболардан бу нақл:
Пастга олға кетгандан кўра,
Юқорига чекинган маъқул...

Муҳаммад Али

@muhammadaliijodi Ochish/sharhlash

2023-03-15 06:47:08 Қўмсаш

Олис, олис, қўл етмас жойлар!
Болалигим, оҳ, болалигим,
Ҳар бир дами бенолалигим,
Олис, олис, қўл етмас жойлар!

Ташвиш надир, англамадинг сен,
Шўх ва учқур тойчоқ мисоли,
Кўчаларда қолди шамолинг,
Ташвиш надир, англамадинг сен.

Жавлон уриб майдонлар аро
Гижинглатиб ёғоч отингни,
Орзуларга кўмдинг ёдингни,
Жавлон уриб майдонлар аро.

Билганингни қилгансан, шеърим,
Ушламаган қўлингдан биров,
На сохталик, на дўсту на ёв...
Билганингни қилгансан, шеърим.

Муҳаммад Али

@muhammadaliijodi Ochish/sharhlash

2023-03-14 06:03:46 Қўзичоқ

Яшил ўтлоқ эркаси, сакрай–сакрай тинмайсан,
Оламда не гаплар бор, англамайсан, билмайсан...

Майсаларга эгиб бош, курт–курт қиласан доим,
Онанг суйиб юнгларинг ялаб қўяр мулойим.

Нарироқда аллаким сени кузатар шу чоқ,
Кўзларида недир бор, ёнида совуқ пичоқ..

Сенга боқиб кўзлари тиниб кетса ажабмас,
Сенга қадар пичоғи синиб кетса, ажабмас.....

Муҳаммад Али

@muhammadaliijodi Ochish/sharhlash

2023-03-13 09:36:05 Ochish/sharhlash