Muhammad Ali ijodi

2023-03-29 08:43:42 Ҳаёт тиғиз...

Ҳаёт тиғиз...
Яшашга вақт йўқ,
Ҳаёлимда нурли фикрлар.
Қўлинг тутар лек узуқ-юлуқ,
Нотинч дунё, икир-чикрлар...

Ҳаёлингда йўқ нарса бирдан
Рўбарўнгдан чиқиб қолгувси.
Фикр-ўйинг тиқилинч, тирбанд,
Неча кунлаб вақтинг олгувси.

Касал кўриш... турфа хил ишлар...
Оқибатни айтай олиб тан:
Орттиради баъзан ташвишлар
“Миллий”даги талаба жиян.

Мусофирлик кўрмай, чинакам
Ҳеч мусулмон бўлмасин билиб,
Россиядан қайтмоқда укам,
Азоб тортиб, “мусулмон” бўлиб.

Қачонлардир четга йўл олган,
“Ватан, Ватан!” дея соғиниб
Шифтга осиб қўйган бир халта
Тупроққа кўз тикар оғриниб...

Ҳаёт тиғиз...
Дер: “Қилгил ҳавас,
Шу Ватаннинг қадрига етгил!
Бир томчи қон, бир лаҳза нафас
Аямагил, жон фидо этгил!”

Гуркирайди ўзгача ҳаёт,
Гулларда ҳам ўзгача бир ранг.
Бораётир баркамол авлод,
Ортда қолмай қадам ташласанг!

Ўзинг билан, бошқаларни ҳам
“Ватан!” дея олға бошласанг!
Десанг: “Ватан!
Онажон!
Онам!..”
Ёниб,
ёниб,
ёниб яшасанг!

Муҳаммад Али

@muhammadaliijodi Ochish/sharhlash

2023-03-28 06:17:22 Фард

Муҳаббат – май каби олгай баҳони:
Тенг қилиб қўяди шоҳу гадони.

Муҳаммад Али

@muhammadaliijodi Ochish/sharhlash

2023-03-27 10:20:05 Рубоий

Аввало ул ёри маҳбуб суйдирмасин эрди,
Суйдирсину вале жондан тўйдирмасин эрди.
Мен ошиқнинг ғариб шомин ёритсин-да шам,
Ёритмаса, ҳеч бўлмаса куйдирмасин эрди...

Муҳаммад Али

@muhammadaliijodi Ochish/sharhlash

2023-03-26 08:34:27 Рамазон айтиб келдик эшигингизга...
(“Бешгул” достонидан парча)

Ғаройибот болалигим, қандай сеҳринг бор?
Қад ростлайсан хотиралар ичра улуғвор!
Рўза ойи,оқшом чоғи болалар бари
Ҳар эшикда такрорлардик тўти сингари:
“Косага буғдой қўйгандим,
Ундимикин-о, ундимикин-а!
Фалончихонлар чиқмайди,
Туғдимикин-о, туғдимикин-а?..”
Кеч қолганлар чиқмагунча тинчимасдик биз,
Йўлга сиғмай тошар эди қувноқ сафимиз.
Сўнгра хуфтон қилар эдик рамазон айта,
“Уй-уйига!...” – деб қўярдик, уйларга қайта...

Муҳаммад Али

@muhammadaliijodi Ochish/sharhlash

2023-03-25 07:48:12 Фотиҳа сураси илҳоми

Бисмиллоҳир раҳмонир раҳим
Мақтовлар сенгадир, парвардигорим,
Ўзинг меҳрибонсан, айлагил шафқат.
Қўлингда жазо–ю сийловнинг бори,
Сенга сиғинамиз, тилаймиз мадад.
Шундайин ҳақ йўлга бошла бизларни,
Насибамиз бўлсин неъматларинг то.
Йўлидан адашган толесизларни
Бизларга дуч этма, учратма асло!

Муҳаммад Али

@muhammadaliijodi Ochish/sharhlash

2023-03-24 13:37:43 Фард

Дунёнинг иши шу: кўнгил олмоқ, бил,
Кўнглимни олгину кўнглингни чоғ қил!

Муҳаммад Али

@muhammadaliijodi Ochish/sharhlash

2023-03-22 07:28:15 Ажаб, дўстлар...

Ажаб, дўстлар, бўлибман ошиқ
Сочи узун ғаройиб қизга.
Ўйлайману, оҳ, завқим ошиб
Бериламан жунбушли ҳисга.
Бироқ севгим айласам изҳор,
Сўзларимга қулоқ солмайди.
Йигитларнинг ёридай дилдор,
Гулдасталар берсам олмайди.
Боқмайди. Ё ёқмайди сўзим,
Ё севгани бошқа эҳтимол.
Койинаман ўзимдан ўзим,
Кезинаман гумон ичра лол...
Қайга борсам қалбимда ёлғиз
Ул қиз ўйи, ул чечак иси...
Кейин билсам, мен ёқтирган қиз –
Илҳом экан,
Илҳом париси!..

Муҳаммад Али

@muhammadaliijodi Ochish/sharhlash

2023-03-20 13:37:07 Азиз дўстлар, муҳтарама опа-сингиллар, қадрли мухлислар! Барчангизни кириб келаётган 2023 йил Наврўз байрами муносабати билан чин юрагимдан муборакбод этаман! Баҳор улуғ ва соҳибжамол фасл, у бизни мафтун этади, кўнглимизга фарах солади, руҳлантиради. Ҳаётнинг ҳамиша давом этишини, интиҳо билмаслигини намоён этади. Табиатнинг мўжизаси баҳордан, кўкламдан, навбаҳордан завқланайлик, ундан илҳомланайлик, руҳланайлик, кўнглимизга куч - қувват олайлик. Яна бир карра Наврўз муборак бўлсин деб қоламан.

Муҳаммад Али

@muhammadaliijodi Ochish/sharhlash

2023-03-19 22:26:08 Yangi konstitutsiya  - mening kelajagim!

Muhammad ALI
Xalqaro Amir Temur xayriya jamoat fondi raisi, O‘zbekiston xalq yozuvchisi
  Ochish/sharhlash

2023-03-19 15:47:28 #ҳудудлардан_хабарлар

Соҳибқирон Амир Темур таваллудининг 687 йиллиги муносабати билан Қашқадарё вилоятида ўтказилган “Амир Темур - мероси ва Учинчи Ренессанс” мавзусида илмий-амалий конференциядан видеолавҳа "ДИЁР ЯНГИЛИКЛАРИ"да.

Манба:
https://t.me/qashqadaryo_trk


Халқаро Амир Темур хайрия жамоат фонди ахборот хизмати Ochish/sharhlash