2022-07-14 11:00:02
TAVALLO
Oq yoʻrgakka oʻragansan oʻzing bizni,
Ham oq yuvib-taragansan oʻzing bizni.
Beshigimiz uzra bedor ona boʻlib,
Kunimizga yaragansan oʻzing bizni.
Fidoying boʻlgaymiz seni, Oʻzbekiston,
Hech kimga bermaymiz seni, Oʻzbekiston!..
Qalqoning bor, kim qasd qilsa gar joningga,
Alpomishlar ruhi yor har oʻgʻloningga.
Asragaymiz giyohing ham gulday oʻpib,
Yovlar yaqin yoʻlolmagay qoʻrgʻoningga.
Adoying boʻlgaymiz seni, Oʻzbekiston,
Hech kimga bermaymiz seni, Oʻzbekiston!..
Tuzing totib, unutganlar xor boʻladi,
Koʻzlariga ikki dunyo tor boʻladi.
Shodon daming koʻrolmagan yurtfurushlar,
Bir kun bir kaft qumlogʻingga zor boʻladi.
Yoningda turgaymiz seni, Oʻzbekiston,
Hech kimga bermaymiz seni, Oʻzbekiston!..
Gul koʻringan dashtingdagi giyoh-xasdir,
Sodda dil-u ulugʻvorlik senga xosdir.
Sevamizki, choʻllaring ham bizga jannat,
Tuprogʻing ham Makka misol muqaddasdir.
Onadek koʻrgaymiz seni, Oʻzbekiston,
Hech kimga bermaymiz seni, Oʻzbekiston!
Muhammad Yusuf
T.me/Muhammad_Yusuf_ijodi
964 viewsFarangizxon Muxammadaliyeva, 08:00