Мастура Хожи Она Шеьрлари

2022-08-22 07:07:56 ОНА ТИЛАГИ.



Бу кунни мен анча кутдим, узоқ кутдим.
Қанча сўзлар ёд олдим, қанча унутдим.
Ва ниҳоят дил сўзларим сенга тутдим.
Бахтли бўлгин она қизим, гўзал қизим!

Оқ либосинг ярашибди бўйгинангга.
Бугун сени кузатаман уйгинангга.
Топшираман куёвимга- чин эгангга.
Бахтли бўлгин она қизим, меҳмон қизим!

Пешонангга шундай жуфтни битди Аллоҳ.
Жуфтинг энди сенга қалқон, сенга паноҳ
Қўша қариб, даврон суринг ИншаАллоҳ.
Бахтли бўлгин она қизим, ойдин қизим!

Додажонинг, ойижонинг ибрат бўлсин.
Бахтдан кўзинг чақнаб турсин, ёнсин, кулсин.
Бахтинг кўриб хурсанд бўлай, кўнглим тўлсин.
Бахтли бўлгин она қизим, юлдуз қизим!

Шу хонадон номуси бўл, ори бўлгин!
Йўғига кўн, борга доим шукр қилгин.
Сирин яшир, яхшисини достон қилгин.
Бахтли бўлгин она қизим, доно қизим!

Сенга зармас, ҳунар бердим, илм бердим.
Уй- рўзғорда ярайдиган билим бердим.
Ҳаё, ибо ва тақводан кийим бердим.
Бахтли бўлгин она қизим, асал қизим!

Қўлдан қўйма Каломуллоҳ- Қуръонингни.
Ғанимат бил ҳар дақиқа, ҳар онингни.
Жиловлагин суяксиз тил- забонингни.
Бахтли бўлгин она қизим, ширин қизим!

Бугун сени янгаларинг олиб кетди.
Отанг кўзин ёшлаб, дуо олиб кетди.
Эркалигинг ота уйда қолиб кетди.
Бахтли бўлгин она қизим, эрка қизим!

Қайнотангнинг савлатидан чўчиб тургин.
Қайнонангга келин эмас, қиздек бўлгин.
Қайни бўйнинг хизматин қил, рози қилгин.
Бахтли бўлгин она қизим, гўзал қизим!

Қудалардан раҳмат келтир, хурсанд бўлай.
Кўзим қувнаб бахтинг кўрай, тахтинг кўрай.
Аллоҳ берса бир йилдан сўнг бешик қилай.
Бахтли бўлгин она қизим, гўзал қизим!
Оқ кўйлагинг ярашибди, асал қизим!


https://t.me/Masturahojionasherlari Ochish/sharhlash

2022-08-22 07:07:37 Ойдинларим!
Қиз узатганмисиз? Ҳаётнинг ширин чоп- чоплари, югур- югурлари бошингиздан ўтганми?

Қизингизга аталган хоналарни кўриб келиб, хаёлингизда неча марта ясатгансиз, чинниларни неча марта шкафга жойлаштиргансиз?

Яна шу чоп- чопларнинг орасида ҳаёлингизда яна бир фикр турган: "Никоҳ куни сўз беришса нима дейман?".

Давранинг ўртасига чорлаб, қўлингизга микрафон тутишганда, сизни ҳурмат қилиб жойида тик турган келин- куёвни кўриб, ҳаяжондан ўйлаган сўзларингиз эсингиздан чиққанми?

Мен қиз узатаётган онанинг қалб сўзларини қоғозга туширдим. Бир ўқиб кўрингчи. Ochish/sharhlash

2022-08-22 07:07:21 Ассалому алайкум Қадрдоним! Омонмисиз? Тану жонингиз соғми?
Бағрингиздаги суйган инсонларингиз соғ саломатми?
Жигарларингиз эсон- омонми?
Узатган қизларингиз қумтошдек ўтиришибдими?

Аллоҳ кексаларга имон, ёшларга инсоф, юртимизга тинчлик, оби равонга барака берсин.

Беморларга шифо, қарздорларга нажот, мусофирларга сабр, икки йўл ўртасида турган келинчакларга оқ йўл берсин! Ochish/sharhlash

2022-08-04 09:11:04 УЙДА ЭРКАК УСТУН БЎЛСА

Уй жойларинг обод бўлар,
Ғор рўзғоринг доим тўлар,
Омад келар, бахтинг кулар,
Уйда Эркак устун бўлса!

Ҳар нарсада барака бор,
Фарзандларинг хушхулқ, хушёр,
Хотиржамлик, тинчлик бисёр,
Уйда Эркак устун бўлса!

Ҳар қадамдан бохабардир,
Ҳар бир ишингга раҳбардир,
Султонларга баробардир,
Уйда Эркак устун бўлса!

Салмоқ бордир сўзларида,
Чуқур маъно кўзларида,
Мехр балқар юзларида,
Уйда Эркак устун бўлса!

Шаҳд сўзи ва қаҳри бордир,
Қаҳрида ҳам меҳри бордир,
Ҳар сўзида сеҳри бордир,
Уйда Эркак устун бўлса!

Ўзгалар хизматин қилиб,
Аёл юрмас юртлар кезиб,
Фарзанд бундан қолмас безиб,
Уйда Эркак устун бўлса!

Гар эркак бўлса зардали,
Аёли бўлар пардали.
Қилмайди иш шармандали,
Уйда Эркак устун бўлса!

Калта кўйлак кийилмайди,
Узун сочлар ёйилмайди,
Ҳузурида ётилмайди,
Уйда Эркак устун бўлса!

Қизлар иболи бўлади,
Кўзи ҳаёли бўлади,
Аёл вафоли бўлади,
Уйда Эркак устун бўлса!

Майда, фасод гап айтилмас,
Бировлар ғийбат қилинмас,
Ота бунга йўл ҳам қўймас,
Уйда Эркак устун бўлса!

Ўсган қизлар бундай уйда,
Эрларига қилмас зарда,
Онадан ибрат олганда,
Уйда Эркак устун бўлса!

Она койиши дўқ бўлар,
Ота койиши ўқ бўлар,
Фарзанддан кўнгил тўқ бўлар,
Уйда Эркак устун бўлса!

Бир сўзли бўлар ўғиллар,
Мағрур ва мард бўлиб ўсар,
Аёллар қадрини билар,
Уйда Эркак устун бўлса!

Тежамлидир тўю, ҳашам,
Исрофга йўл қўймас ҳеч ҳам,
Фарзанд бахтин ўйлар у ҳам,
Уйда Эркак устун бўлса!

Ҳар бир ишга режа тузар,
Аёл битган ишни бузар -
Лекин баъзан фикр сўрар,
Уйда Эркак устун бўлса!

Аёли тўкмас кўз ёшлар,
Ҳафа қилмас бағритошлар,
Унга отилмайди тошлар,
Уйда Эркак устун бўлса!

Эркак қалқон, эркак паноҳ,
Шер панжали, бургут нигох,
Мададкордир унга Аллоҳ,
Уйда Эркак устун бўлса!

Хонтахтага бир мушт уриб,
Гапини қўйсин уқтириб,
Юрсин давру даврон суриб,
Уйда Эркак устун бўлса!

Бехудага бақирмасин,
Биров дилин оғритмасин,
Ўйламасдан гапирмасин,
Уйда Эркак устун бўлса!

Эркак ўрни баланд жойда,
Ота - улуғ! Бу - қоида!
Фарзандларга бундан фойда,
Уйда Эркак устун бўлса!

Эркак шаъни улуғ доим,
Доғ туширманг унга Ойим,
Ўзинг асрагин Худойим,
Уйда Эркак устун бўлса!

Эркак ёнса мисли олов,
Аёлга бермаса жилов,
"Эркакмиш…" демайди биров,
Уйда Эркак устун бўлса!

Пойгакдамас эркак ўрни,
Унинг жойи - уйнинг тўри,
Қуримайди хотин шўри,
Уйда Эркак устун бўлса!

Салобатли бўлсин эркак!
Ростгўй, доно бўлсин эркак!
Олижаноб бўлсин эркак!
Уйда Эркак устун бўлса!

Мастурахон айтар сўзни,
Жон қизларим! Очинг кўзни!
Қиролича билинг ўзни,
Уйда Эркак Султон бўлса!
Қирол бўлса! Хоқон бўлса!

Мастура Хожи Она Шеьрлари
https://t.me/joinchat/Y01YDnuuhO5lN2E6 Ochish/sharhlash

2022-08-04 09:06:43 Росулуллоҳ (с.а.в.) айтганлар:- "Қуръон ўқилган уй худди ердагиларга юлдуз кўрингани каби осмон аҳлига кўрсатилади".

(Имом Байҳақий ривояти).



"Ким Аллоҳ таоло ва охират кунига имон келтирса, яхши гапларни гапирсин, ёки жим турсин".

(Имом Бухорий ривояти.)



"Ё Илоҳи, биз гадоларни ҳам-а.
Ёрлақаб, авф эт гуноҳларни ҳама.
Барчамиз ожиз, гуноҳкор бўйла, бас.
Сендин ўзга ҳеч ким мадад бергувчимас.".

Фаридуддин Аттор.

Ochish/sharhlash