2020-11-16 03:32:58
Obbo Baqqalaa Garbaa mana hidhaatti dhukkubsachuudhaan
haala ulfaataa keessa jiraachuu Haatii warraa isaanii Aadde
Haannaa Raaggasaa OMN-tti himan.
Obbo Baqqalaa Garbaa dabalatee Jawar Mohammad fi
Haamzaa Booranaa akkasumas Shamsaddiin Xahaa mana
hidhaa Qaallittii bakka tokkotti hidhamanii kan jiran yoo ta'u,
haala fayyaa isaaniin wal qabsiisuun kanaan dura Manni murtii
waldhaansa fayyaa akka argachuu qaban ajajee ture. Haalli
fayyaa isaaniis kana dura haala gaariirra kan ture yoo ta'u,
yeroo ammaa kana garuu Obbo Baqqalaafi Obbo Jawaar
Mohammad haala nama yaaddessu keessa jiraachuu maatiin
isaanii OMN-tti himan.
Akka Aadde Haannaa Raggaasaa jedhanitti kaleessa haalli
fayyaa Obbo Baqqalaa Garbaa fi Jawaar Mohammad gaarii
ture. "Har'a yeroo maatiin akkuma yeroo kaaniitti nyaata
geessuun bakka sana deeman, Obbo Baqqalaa, Jaawarfi
Haamzaan nama isaan dubbisetti gad ba'anii dubbachuu hin
dandeenye." jechuun OMN-tti himan.
Miseensa maatii Obbo Jawaar keessaa tokko kan ta'e namni
kan biraanis akka yaada nuuf kenneen, "yeroo nyaataafi uffata
qabannee akkuma duriitti isaan dubbisuuf deemnu, kan gad
ba'ee nu haasofsiise Shamsaddiin Xahaa qofa ture. Innis
soorataafi uffata nurraa fudhachuu diduudhaan, 'ammatti
ogeessa fayyaa qofa barbaanna malee nyaata miti.' jechuun
Obbo Baqqalaa Garbaa haala ulfaataa keessa jiraachuu nutti
hime." jedha.
Obbo Baqqalaa waliin Jawaarifi Haamzaa dhukkubus, haalli
Obbo Baqqalaa keessa jiran ulfaataa ta'uu kan dubbatu namni
kun, "akka Shamsaddiin irraa odeeffannetti, Obbo Baqqalaa ol
jedhanii dhaabbachuu hin dandeenye. Ho'insi qaama isaanii ol
ka'uun, miilli isaaniillee dhiita'ee jira." jechuun OMN-tti hime.
Guyyaa kaleessaa Dookterri fayyaa akka seenuuf hayyamamus,
har'a yeroo Dookterri fayyaa dhufanitti bulchiinsi mana hidhaa
Qaallittii Dookteroota kana alatti ittisanis jedhu.
Kanaan dura Obbo Baqqalaa Garbaa ijisaanii dhukkubsachaa
kan ture yoo ta'u, yeroo ammaa kana garuu Obbo Baqqalaa,
Jawaarfi Hamzaa haala wal fakkaataatiin fayyaan isaanii
hubamee jira jechuun maatiin himaniiru.
#faanahaqaa
@faana_haqaa
@abdikedbot
40 viewsAbdurhemanIbnukedir, 00:32