Doctor's Mind 👩‍⚕️

2022-08-27 22:13:38 ​​​​ Jojo Moyes
"Sendan keyin" asari

Bugun o'z romantik asarlari bilan barchaga ma'lum va mashhur bo'lgan Jojo Moyesning navbatdagi asari haqida gaplashamiz. Barchamiz uning "Sen bilan uchrashguncha" ("To seni topgunimcha") asarini yaxshi bilamiz, hattoki kinofilmini ham ko'zda yosh bilan tomosha qilganmiz. Bugun men mana shu asarning davomi bo'lgan yana bir ajoyib romantik roman "Sendan keyin" haqida fikrarimni bo'lishmoqchiman. Odatda birinchi qismi juda mashhur bo'lgan asarlarning keyingi qismi uning darajasidek mashhurlikka erisha olmaydi, lekin Jojo Moyesning ushbu asari bu fikrlardan yiroq. Hattoki shu seriyadagi asarlarning uchinchi qismi "Men hamon o'sha-o'shaman" ham mashhurlikda o'zidan oldingi qismlardan kam emas.

Xo'sh, "Sendan keyin" qaysi jihati bilan kitobxonni o'ziga jalb qila oladi deb o'ylaysiz? Ushbu asarda Luiza Klarkning Uillning vafotidan keyingi taqdiri yoritilgan bo'lib uning hayotidagi past-balandliklar tasvirlanadi. Luiza Klark Uillning o'limidan keyin o'z shaxsiy hayotini qura oladimi?
Bilamizki ko'pchilik sevishganlarning hayotida ayriliq yuz berganda vafot etganidan ham ko'ra tirik qolgani ya'ni yashayotganiga qiyin bo'ladi. Qaytadan shaxsiy hayot qurish, hayotini yangidan boshlash oson bo'lmaydi. Nima ish boshlasa ham o'zgalarning fikri muhimdek ko'rinadi, o'zini vafot etgan juftining o'limida ayblaydi. Juftining hayotini saqlab qola olmagani uchun o'zini gunohkor deb biladi. Yangi inson bilan tanishishniku gapirmasam ham bo'ladi. Luiza Klark ham aynan shu narsalarni boshdan kechiradi. Uilldan keyingi hayotiga ko'nika olmaydi, psihologik yordam guruhiga qatnasha boshlaydi. Kunlarning birida esa uning hayotiga bir inson kirib kelib uni 180°ga o'zgartirib yuboradi. Xo'sh, Luiza u bilan qanday tanishadi va uning taklifiga rozi bo'ladimi? U aybdorlik hissidan chiqib keta oladimi? Uillni unuta oladimi? Shaxsiy hayotini yangidan qura oladimi? Shu va shunga o'xshash savollarga javobni kitobni o'qigach topasiz.

Ushbu asarda voqealar boshqacha rakursda ko'rsatilgan bo'lib, yangi qahramonlar kitobni o'qish davomida sizni zeriktirib qo'ymaydi. Romantik asarlar ishqibozlari uchun tavsiya qilaman. Albatta yoqadi.

@doctorsmind Ochish/sharhlash

2022-08-09 11:39:41 Bugungi kitobsevarlar kuni bilan tabriklayman. Kitob o'qishdan, xarid qilishdan aslo charchamang!

@doctorsmind Ochish/sharhlash

2022-08-03 20:47:46 ​​​​ Herbert Uells
"Ko'rinmas odam" asari

Herbert Uells barchamizga o'zining ilmiy fantastik asarlari va ular asosida ishlangan kinofilmlar orqali yaxshi tanish. Uning aksariyat asarlarining bosh qahramonlari olimlar bo'lib, bu yozuvchi asarlarini birlashtirib turuvchi umumiylik hisoblanadi.
Endi sirli nomi bilan o'ziga tortuvchi asarga qaytaman. Xo'sh asar nomi nima uchun "Ko'rinmas odam"? Asar nima haqida?
Asar dastlab yangi shaharga Ko'rinmas odam(Griffin)ning tashrifi bilan boshlanib unga atrofdagi odamlarning munosabati, uning yangi joydagi hayoti bilan davom etadi. Griffin ixtirosining yaratilish tarixi, boshdan o'tgan voqealari, xarakteridagi yovuzlikning sabablari esa keyinroq kitobxonga ma'lum bo'la boshlaydi. Ya'ni yozuvchi bosh qahramonning haqiqatlarini asar boshidan ochmasdan o'quvchini yaxshigina qiziqishda ushlab turadi.
Dastlab Griffin o'z tanasida o'tkazgan ixtirosidan zavqlangan bo'lsa keyinroq esa bu ixtiro unga halaqit qila boshlaydi. Ya'ni ixtironing hali mukammal darajaga yetmaganligi va uning mukammal darajaga olib chiqishga bo'lgan qarshiliklar, kundalik hayotidagi qiyinchiliklar uni qiynay boshlaydi. Yetmaganiga esa odamlar uni qabul qilmaydilar.

Bilamizki ko'pchilik ilm insonlari yolg'izlikda, insonlardan uzoqda hayot kechiradilar. Griffinga ham ixtirosini oxiriga yetkazishiga yordam bermagan jamiyat uning yanada yovuzlashishiga va yovuz niyatlarni o'ylashiga sabab bo'ldi. Buning natijasida uning ixtirosi yomonlik maqsadida ishlatildi.

E'tibor bergan bo'lsangiz, mavzusi shunga o'xshash asarlarda ko'pchilik ilm insonlari yolg'izlikda, insonlardan uzoqda hayot kechiradilar. Ixtirolarini amalga oshirish, odamlarga yetkazish uchun anchagina qiyinchiliklarni boshdan kechiradilar va afsuski oxir oqibat ayanchli taqdirga uchraydilar. Balkim bunga sabab jamiyat o'zgacha qobiliyatli insonlarni qabul qilmasligi ya'ni ularni ilgarilab hokimyatni egallab olishlaridan qo'rqishlaridir.

Bir qaraganda asar mavzusi eskidek ko'rinishi mumkin. Ya'ni iste'dodli insonlarni qo'llab-quvvatlamaslik nafaqat ixtironi mukammal bo'lishiga halaqit beribgina qolmay ilm-fan rivojlanishiga ham to'sqinlik qiladi degan fikr uyg'otishi mumkin, lekin ushbu asar o'z davri uchun juda dolzarb bo'lgan. Hattoki hozirgi kunda ham Herbert Uells asarlari ko'pchilik yozuvchilar uchun ilhom manbai hisoblanadi. Ilmiy-fantastik asarlar tasavvur olamimizni kuchayishiga, hayolot olamimizni rivojlanishiga sabab bo'ladi. Balkim shuning uchun ham ketma-ket shunday asarlarni o'qiyotgandirman. "Professor Douelning boshi" asari ham g'oya jihatdan ushbu kitobga yaqin. Ya'ni ikkala asarda ham insonlarda o'tkazilgan nomukammal tajribalar yaxshilikka olib bormasligining guvohi bo'lishingiz mumkin.

Asardan o'zimga shunday xulosa oldim: "Ilm kishisi doimiy qo'llab-quvvatlashga muhtoj chunki uning ixtirosining yuzaga chiqish yoki chiqmasligi ana shu quvvatlash bilan chambarchas bog'liq".

@doctorsmind Ochish/sharhlash

2022-07-27 17:42:12 Bookblogerlarga eng yoqqan kitoblar qaysilar?

(1-qism bu yerda)

2-qism

Sadriddin (PsixoBlog)

1. Rob Brozerton "Suspicious minds"
2. Elliot Aronson "The social animals"
3. Yoal Noa Xarari "Sapiens"

Akbar Mirzo (Kitob qurti)

1. Mortimer Adler "how to read a book"
2. Elaine Aron "the highly sensitive person"
3. Solzhenitsyn "in the first circle"

Muhayyo (nigohlarda)

1.Alixontoʻra Sogʻuniy "Tarixi Muhammadiy"
2.Antuan de sent Ekzyuperi "Kichkina shahzoda"
3.Nabijon Boqiy "Qatlnoma"

Mohina (mohims blog)

1. Rey Bredberi "Farengeyt bo'yicha 451 daraja"
2. Mishel Obama "Becoming"
3. Javlon Jovliyev "Qo'rqma"

Ma'rufjon (Ma'rufjon blogi)

1. Mich Elbom "Morrining seshanba darslari"
2. Balzak "Gorio ota"
3. Somerset Moem "Oy va sariq chaqa"

Raxshona (Yozuvchi kutubxonasi)

1.Nodar Dumbadze "Abadiyat qonuni"
2.Somerset Moem "Oy va sariq chaqa"
3.Kobo Abe “Qumdagi xotin”

Mahin (mahins world)

1.Shayx Muhammad Sodiq Muhammad Yusuf "Sunniy aqidalar"
2.Daniel Goleman "Emotional intelligence"
3.Ayn Rand "Atlas shrugged"

Abdurahmon (kitoblar ombori)

1.Toni Shey "Baxt yetkazish xizmati"
2.Shayx Muhammad Sodiq Muhammad Yusuf rohimahulloh "'Ijtimoiy odoblar"
3.Erix Mariya Remark "Uch og‘ayni"

Asalxon (Miracle books)

1."Oqcharloq Jonatan Livingston"
2.Даймон Захариадис "Хватит быть удобно"
3.Shayx Muhammad Sodiq Muhammad Yusuf "Ruhiy tarbiya"

@kitob_ombori Ochish/sharhlash

2022-07-26 15:02:43 ​​Bugun yangi stellajni ko'rish bohona dugonamning bir kitobini o'g'irlab oldim))
Anchadan beri topa olmayotgan kitobim turgan ekan shartta olib sumkamga solib qo'ydim)
Bu kitob Herbert Uellsning "Ko'rinmas odam" asari edi. Ushbu asarning kinosini bir paytlar ko'rgandim. Kitobini ham juda maqtashadi.

Siz ham mehmonga borib, o'zingiz bilan kitob olib kelasizmi?
Albatta xazil qilib yozgandim. Kitobni so'rab oldim)

@doctorsmind Ochish/sharhlash

2022-07-26 14:54:32 ​​Ko'pchilik kitobxonlarning ajoyib orzularidan biri bu - hayollaridagi stellajni yasattirish va unga sevimli kitoblarni taxlash bo'lsa kerak. Menimcha, hech qanday ortiqcha detallar va turli xil bezaklarsiz klassik stellaj eng chiroylisi bo'lsa kerak. Bugun ishga ketishdan oldin dugonamning yangi stellajini ko'rgani bordim. Stellaj darvozadan kirganda to'g'rida joylashgan bo'lib, kirgan odamning birinchi e'tibori kitoblarga tusharkan. Men ham kirishim bilan dugonam bilan so'rashishni ham unutib stellajni oldiga borib olibman))
Xullas, stellaj judayam yoqdi. Menga ham nasib qilsin. Ha aytgancha, stellaj bilan fotosessiya qilishni ham unutmadik))
Rasmda stellajning hamma qismi tushmagan.

@doctorsmind Ochish/sharhlash

2022-07-25 19:32:19 Bookblogerlarga eng yoqqan kitoblar qaysilar?

Qarasam bari tarbiyachi, motivatchi, bizneschi, kinnachi, pistachi va boshqa -chilar "Hamma o‘qishi shart bo‘lgan kitoblar" 100 ligi, 200 ligi kabi ro‘yxatlar qilishyaptikan.
Bizi kitobxon blogerlar qop ketibmiz halos o‘zi bunaqa ro‘yxat tuzmagan. Bu xatoni to‘g‘irlash kerak degan fikrga keldim va o‘zim tanigan, bilgan do‘stlarimdan o‘zini ta'sirlantirgan, yoqqan kitoblarni 3 tasi sanab berishini so‘radim. Natijada yaxshigina ro‘yxat shakllanib qoldi.
Demak, natijalar quydagicha:

Muhammad Amin ( Ilm nur kutubxonasi)

1.Tolstoy "Iqrornoma"
2.Cho'lpon "Kecha va kunduz"
3.Rey Bredberi "Farengeyt 451 bo'yicha daraja"

Ismoiljon (Kitobxo‘r)

1.Adib Xolid "O‘zbekiston tavalludi"
2.Jadidlar. "Abdurauf Fitrat"(zabarjad mediya nashriyoti)
3.Erix From "Ozodlikdan qochish"

Jasurbek (panda books)

1.Dyuma "Graf Monte Kristo"
2. Oruell "1984"
3. Aytmatov "Asrga tatigulik kun"

O‘ktam (Kitoblog)

1.Alber Kamyu "Begona"
2. Oskar Uayld "Dorian Grey portreti"
3. M. Bulgakov "Usta va Margarita"

Nazarbek (Bookerberg)

1. Ayzek Azimov, "Foundation"
2. Oldos Xaksli "Ajib yangi dunyo"
3. Teodor Drayzer "Sarmoyador"

Maftuna (mutolaa olami)

1. Rey Bredberi. Farengeyt boʻyicha 451 daraja.
2. Hermann Hesse. Choʻl boʻrisi.
3. Daron Ajemoʻgʻlu va Jeyms Robinson. Mamlakatlar tanazzuli

Dildora (doctors mind)

1.Markus Zusak - "Kitob o'g'risi"
2.Xezer Moris - "Osvensimdagi tatuirovkachi"
3.Aleksandr Belyayev "Professor Douelning boshi"

Ilhom (salimov blogi)

1.Jek London "Martin Iden"
2.Oskar Uayld "Dorian Grey portreti"
3.Fyodor Dostoyevskiy "Jinoyat va jazo"

Mirzohid (Bobil kutubxonasi)

1.Gyote "Faust"
2.Yan Parandovskiy "So'z kimyosi"
3.Servantes "Don Kixot"

Davomi bor....

@kitob_ombori Ochish/sharhlash

2022-07-25 11:35:45 #mutolaa

Ushbu yangi haftani mana shu 3 ta kitob bilan o'tkazmoqchiman, ya'ni badiiy va ilmiy-ommabop kitoblarni birgalikda o'qib ko'rmoqchiman. Bolalar tarbiyasiga oid kitobni avvalroq boshlab qo'ygandim. Ushbu hafta ob-havo issiqligi biroz kamaysa, ishtiyoq so'nmasa albatta yaxshi mutolaa bo'ladi)

@doctorsmind Ochish/sharhlash

2022-07-23 17:14:43 ​​​​ Aleksandr Belyayev
"Professor Douelning boshi"

Aleksandr Belyayev nomi ko'pchiligimizga juda yaxshi tanish, uning asarlarini o'qimagan yoki shu asarlari asosida ishlangan filmlarni tomosha qilmagan inson kam topiladi. Shaxsan o'zim Belyayev nomini "Odam Amfibiya" filmi orqali yaxshi taniyman, lekin afsuski kitoblarini avval o'qib ko'rmaganman. "Professor Douelning boshi" asari yozuvchi ijodidan o'qigan birinchi asarim hisoblanadi va shuni qo'rqmasdan ayta olamanki, debyut uchun juda zo'r asar bo'ldi. Kitob Belyayev nomini yaxshi ko'rsatib bera oldi.

Tabiatga qarshi bo'lgan hech bir narsa hech qachon yaxshilikka olib bormaydi.
Fridrix Shiller

Endi asar bo'yicha to'xtalib o'taman. Sizga kitob nomidan ham ma'lumki, asar bir professorning hayoti va g'ayritabiiy tajribalari haqida yozilgan. Qiziq, bu tajribalar o'zini oqlarmikin yoki yo'q?

Tasavvur qilib ko'ringchi, inson tanasiz faqat boshi orqali yashay olishi mumkinmi? Inson uchun ko'proq tanasining qaysi qismi muhimroq deb o'ylaysiz? Bosh qismimi yoki gavda? Savol sizni biroz g'alati ahvolga solishi mumkin. Bilamizki, olimlar uchun bosh qismi ya'ni miya ular hayotining mazmuni, gavda qismi esa deyarli ahamiyatsiz.
Professor Douel ham vafot etdi lekin uning boshi qaytadan tirildi. U faqat boshi ya'ni miyasi orqali fikrlab yashamoqda va bu uning hayot tarzi uchun ham katta o'zgarish bo'lmadi. Endi o'ylab ko'ring aqliy mehnat bilan emas jismoniy mehnat bilan ish qiluvchi fermer uchun tana qanchalik muhim? Ular uchun boshning o'zi bilan hayot kechirish qanday kechadi? Belyayev aynan mana shu misollar bilan inson tanasining turfa xil kasb egalaridagi ahamiyatini bizga ochib bera olgan.

Kitobdagi tajribalar tufayli asar tibbiyotdan uzoq yoki o'ta ta'sirchan insonlar uchun o'qishga qiyinchilik tug'dirishi yoki og'ir asarday tuyilishim mumkin, lekin aytish mumkinki, o'sha davrlarda xirurglar haqiqatdan ham ana shunday tajribalarni o'tkazishgan. Bu esa hozirgi tibbiyotdagi anchagina yangiliklarni ochilishiga, ko'pchilik bemorlar hayotini saqlab qolishga sabab bo'lgan. Faqatgina ayrim insonlar hayoti bu tajribalar uchun qurbon qilingan. Masalan, xirurgiyadan uzoqlashib, qon quyish amaliyotini o'zini olaylik, qon guruhlari, rezus faktor hali noma'lum bo'lgan davrlardayoq yoshi katta amaldorlar yosharish maqsadida yosh yigit-qizlarning qonini o'ziga quydirib, tajriba muvafaqqiyatsizligi oqibatida vafot etganlar. Yana ayrimlari esa tasodif tufayli omon qolganlar. Borgan sari tajribalarda ulkan yutuqlarga erishilishi natijasida hozirgi kunda qanchadan-qancha insonlar hayoti saqlab qolinmoqda, noyob operatsiyalar o'tkazilmoqda.
Professor Douel ham vafotidan keyin o'z a'zolarini tajriba uchun, fan yanada rivojlanishi uchun qoldirgandi, lekin birinchi tirik bosh aynan o'ziniki bo'lishini bilmagandi.
Asar faqatgina fantastik tajribalar(qaysidir ma'noda haqiqat)dangina iborat emas. Unda boshqa ajoyib voqealar ham bo'lib kitobxonni tajribalar bilangina zeriktirib qo'ymaydi.
Ushbu asar issiq iyul oyida men uchun zo'r mutolaaga sabab bo'ldi.

Aytgancha, kitobning kamchiligi ham bor. Tarjima yaxshi chiqqanu lekin imlo xatolarga e'tibor berilmagan. "Yangi asr avlodi" nashriyotidan bundan oldin o'qigan kitobim "Sharqiy ekspressdagi qotillik" da esa xatolar yo'q edi. E'tibor berib qarasam muharrir va musahhihlar boshqa ekan.
Kitob muqovasi esa judayam zo'r, ayniqsa rangi orginal.
Xullas, kitobga yanada mehr berilganda yaxshi bo'lardi. Chunki asarning o'zi zo'r.
Tavsiya qilaman.

@doctorsmind Ochish/sharhlash

2022-07-19 13:02:31 #mutolaa

Yangi kitob mutolaasini boshladim.
Aleksandr Belyayevning yangi nashrdan chiqqan "Professor Douelning boshi" asari.
Belyayev nomi bizga "Odam amfibiya" asari va kinosi orqali yaxshi tanish. Ko'plab ilmiy fantastik asarlar muallifi.
Bugun o'qishni boshlagan kitobim ham ayni menbop, ya'ni tibbiyot bilan bog'liq ekan. Yana bosh qahramonning bronxial astma kasalligi bor ekan. Aynan mening sohamning kasalligi))
Faqat kasallikni o'zbekchalashtirib damqisma deb yozilgani umuman yoqmadi. O'zbek tili juda boyda))

Nachora, ko'nikib o'qishda davom etamiz.

@doctorsmind Ochish/sharhlash