Икром Аввалбоев саҳифаси

2023-01-05 14:25:26 Жўжа нега тухумдан арзон?

Жўжалар 300 сўмдан сотилаётган экан. Соққадан муаммонгиз бўлса кредитга ҳам берворишади.

Унча тушунмаган жойим – тухумнинг нархи 1000 сўмдан қимматку...

Бизнесга тушунмасанг ҳам қийин экан.

Икром Аввалбоев

https://t.me/Avvalboyev Ochish/sharhlash

2023-01-03 16:39:30 Ochish/sharhlash

2023-01-02 18:13:00 Афсус, хонадонга ўт кетиши натижасида уч киши жиддий тан жароҳати олди. Эллик миллион сўмлик моддий зарар кўрилди

Ишхонада шу хабар учун қаттиқ гап эшитган эдим.

Устоз Қурбон Эшматов билан журналда бирга ишлаган, у кишининг дарсини олган шогирдлардан бири бўлганимни ҳамиша мақтаниб айтиб юраман. Бугун устоз орамизда йўқ, лекин уларнинг ўгитлари шогирдларга ҳамиша йўлчироқ.

Кечагидай эсимда.

...Эй, бола! “Натижа” нима дегани эканини биласанми? – устоз столдаги қоғоз-ручкани секин четга суради. Пиёладаги совиб қолган чойни бир ҳўплаб олади. – Уч киши майиб бўлса, ҳамма нарса куйиб кетса... натижа бўладими? Шу жойига, ҳақинг кетса ҳам, “оқибатда” дегин. Жуда бўлмаса “туфайли ёки сабабли” деб кет...

Бу гапга ҳам ўн йилча бўлди.

Устознинг охиратлари обод бўлсин!

Икром Аввалбоев

https://t.me/Avvalboyev Ochish/sharhlash

2022-12-31 22:30:37 Ассалому алайкум. Кириб келган янги 2023 йил муборак бўлсин!
Ochish/sharhlash

2022-12-29 07:45:09 Иш дафтарим болаларнинг қўлига тушиб қолганда...

Бош рассом: Камола Икром қизи.

https://t.me/Avvalboyev Ochish/sharhlash

2022-12-27 12:51:28 Безор бўлдим. Маҳалла раиси зўрми ёки ҳоким ёрдамчиси?..

Танишингиз сиз яшамайдиган маҳалланинг телеграмдаги сўровномасини ташлайди. Бир қўллаб юборинг дейди. Овозни берасиз, қўллаб юборасиз.

Шу кунларда телеграмдаги қариндошлар, улфатлар, шафёрлар... каби гуруҳлардан бунақа сўровлар ёпирилиб кела бошлади. Овоз бермасангиз сиздан қаттиқ ранжиб ҳам қўйишади. Эй, барака топгур бу “Open budget” эмас. Шунга ўхшаш лойиҳа бўлса тушунса бўлади.

Бу сўровнома ҳеч нимани ҳал қилмайди. Буни бирор расмий ташкилот ўтказаётгани, социал таҳлил қилинаётгани йўқ.

Аслида, йил давомида ким қандай ишлади, маҳалла раиси зўрми ёки ҳоким ёрдамчиси кучлими дегандай мазмун берадиган сўровномалар ўтказишни хато деб ўйлайман. Маҳалла идорасида барча бир тан, бир жон бўлиб ишланмас экан натижа бўлиши қийин. Ҳар ким ўзининг аравасини ўзи судраб кетаверса ҳамжиҳатлик қаерда қолади?

Декабрнинг бошида – ҳаво совиб кетган пайтларда кимнинг қандай ишлаганини кўрдик. Маҳалла аҳли фидойиларни ҳамиша қўллаб қувватлайди.

Маҳаллада раис, ҳоким ёрдамчиси, ёшлар етакчиси, профилактика нозири ҳамфикр бўлсин. Бир жамоа бўлсин, уларни бир биридан ажратиб баҳоламайлик.

Узоқни кўзлаган яхши лойиҳалар, сўровномалар бўлиб қолса уларга бефарқ бўлмаслик керак.

Икром Аввалбоев

 https://t.me/Avvalboyev Ochish/sharhlash

2022-12-20 17:37:17 Янги бўйинбоғда расмга тушдим

Аслида гап бўйинбоғда эмас. Шунчаки, Президент парламентга ва халққа мурожаат йўллаган минбар олдида турганимни кўп қатори мақтангим келди.

Ростдан ҳам бугун тарихий кун бўлди. Бу минбардан мамлакат эртаси, халқ фаровонлигига дахлдор қанча масала ўртага ташланди. Кўтарилган ҳар бир масалага эса ўзига хос, узоқни кўзланган ечимлар кўрсатилди.

Ҳозир бу ҳақда ёзмоқчи эмасман. Чунки ЎзА расмий сайтида мурожаатнома бўлаётган пайтда 40 дан ортиқ материал эълон қилинди. Қизиққанлар ушбу ҳаволадан кириб ўқиса бўлади.

Икром Аввалбоев

https://t.me/Avvalboyev Ochish/sharhlash

2022-12-14 09:58:58 Печкага ўтин ташлаётган она

Қиш. Қишлоқда тонг ота бошлади.

Онам ҳовури пасайган печкага ўтин ташлайди. "Жонҳузур"нинг чарсиллаб, гуриллаб ёнишини кўрпага ўраниб ётганча томоша қиламан. Хона бир зумда исиб кетади – қандай ёқимли.

Эрталаб кўпинча сариёғ солинган қайноққина сут ичамиз. Мактабга кечикаётган бўлсак онам сутимизга нон тўғраб қўяди.

...Эшик биров тепиб юборгандай шарақлаб очилади. Ташқаридан синглим билан укам уриниб-суриниб кириб келади. Улардан кейин отам кўринади. Биламан, эрталабдан отам ҳовлининг қорини кураган. Бу икковлон қори очилган жойларни супуриб тозалаган – мириқиб ўйнаган.

Шу дамда ўша болалик чоғларини жуда-жуда соғиняпман.

Шаҳар. Эрталабдан қишлоққа – отамга телефон қиламан. Секин гапиради, укамнинг ўғли ҳали уйғонмаганини айтади. Данагидан мағзи ширинда.

– Ота, энам яхшими? Нима қиляпти?

– Энанг – бардам! Печкага ўтин ташлаяпти...

Укамнинг ўғлига – неварамга бирам ҳавасим келяпти.

Икром Аввалбоев

 https://t.me/Avvalboyev Ochish/sharhlash

2022-11-24 15:52:24 Маҳсисининг қўнжида қинли пичоқ олиб юрган одамнинг неварасиман

Отда... юган тутган бобомнинг белбоғидан ушлаб олмазорни сайр қилиш энг ёқимли “юмуш” эди.

Бобом – катта отам маҳсисининг қўнжида ҳамиша қинли пичоқ олиб юрарди. Бу пичоқда, асосан, набираларга мева-чеванинг пўсти арчиб бериларди. Сергўшт овқатдан чиққан йирикроқ суякнинг этини шилиб олишда ҳам ундан фойдаланиларди. Бир сафар товуқ сўйишганини ҳам кўрганман.

Бобомнинг ўтиб кетганига ҳам кўп йиллар бўлди. Баъзан у инсонни қаттиқ соғиниб кетаман. Дубайдан олиб келинган ушбу совға ўша беғубор дамларни ёдга солиб юборди.

https://t.me/Avvalboyev Ochish/sharhlash

2022-11-12 18:07:52 Самарқанд халқаро аэропортида президентлар ташрифини ёритишда иштирок этдим. Давлат раҳбарларини кутиб олиш жараёни ажойиб!

Бу йил Ўзбекистонга қайси давлат раҳбари неча марта ташриф буюрди?

Саволга жавоб ҳаволаси. https://uza.uz/posts/425106

https://t.me/Avvalboyev

#prezidentlar #UzA #TDTsammiti Ochish/sharhlash