РЕДИСКАДАН ҚАНДАЙ ҚИЛИБ УРУҒ ОЛИШ МУМКИН? Уруғ олиш учун уруғ | AGROBLOGER
РЕДИСКАДАН ҚАНДАЙ ҚИЛИБ УРУҒ ОЛИШ МУМКИН?
Уруғ олиш учун уруғлик редиска кузда етиштирилади, кейин улар ковлаб олиниб, шакли, катта-кичиклиги ва бошқа белгиларига қараб сараланади, кейин янги жойга ўтқазилади.
Баҳорда экилган редискалардан ҳам уруғлик етиштирса бўлади, лекин редисканинг гуллаши ҳамда уруғланиши ёзнинг иссиқ кунларига тўғри келганлигидан уруғининг ҳосили камайиб кетади.
Баъзан илдизмевасини кўчириб ўтқазмасдан баҳорда экилган жойнинг ўзида уруғ етиштирилади. Уруғлик шу усулда етиштирилганда редискадан анча эрта ва юқори ҳосил олиш мумкин. Аммо бу усулда уруғлик учун яхши илдизмеваларни танлаб олишнинг имкони бўлмайди.
Уруғлик редиска яхши ўғитланган ерларга қатор ораларини 60-70 см, қатордаги туплар орасини 30-40 см қилиб ёки 60х60 см ли схемада экилиб, яганалашда ҳар қайси уяда 3-4 тупдан ўсимлик қолдирилади.
Бир нав экинни иккинчисига чатишиб кетмаслиги учун улар бир-биридан очиқ ерларда 2000 м, ҳимояланган жойларда эса 600 м масофада жойлаштирилади. Уруғли редискани парвариш қилиш, 3-4 марта суғориш, қатор ораларини юмшатиш, чопиқ қилиш, азотли ва фосфорли ўғитлар билан озиқлантириш, зараркунанда ва касалликларга қарши курашишдан иборат.
Уруғлик ўсимликлар қўзоқлари сарғая бошлаганда ўрилади ёки илдизи билан суғуриб олинади. Уруғи тўла етилиб, пояси қуригандан кейин у шкифли ёки тўқмоқ барабанли молотилкаларда янчилади ҳамда сараланади. Уруғ ҳосили гектарига 3-5 ц, баъзан 12-15 ц гача боради.
