​​Дарё тўлқинланиб, қирғоқларидан сувлар тошди, онанинг кўзи н | Zebiniso Ahmedova — psixolog blogi

​​Дарё тўлқинланиб, қирғоқларидан сувлар тошди, онанинг кўзи намланди – биринчи марта ҳомиладорлигини сезганида... Бир-бир қадам ташлаб ишга шошди, сел қувгандек ортидан, қорнидаги мурғаккинасига гапира-гапира: “Ҳали шундай одам бўласанки, сенга ҳамма ҳавас қилади-я! Ҳозирча чида болам, чида...”. Онанинг кўзидан селдек юм-юм ёшлар оқди...

Саҳрои Кабир ёмғирга ташна бўлганидек чанқади она, аммо, ўзи ичмай сувни фарзандига тутди... Роҳатланиб сув ичаётган боласини дуо қилиб, кўзи ёшланди онаизорнинг...

Сочидан тортиб, юзларини тирноқчалари билан тирнаб олганида, эндигина оғзига солган нонига эга чиққанида, қўлчаларидан ўпиб, “Болам-эй...” деб оғриқларни “фарзанд роҳати шу-да” деб... яна кўзига ёш олди ОНА!

Сув оппоқ кўпирди... Она эски ирим деб қўлини унга солиб йиғларди: .... ўғлини суннат қилишга келган “уста”га: “Боламга оғриқ берманг...” дея олмай... унсиз йиғларди ОНА...

Биринчи марта боғчага ташлаб келган куни кўзи шишиб кетди. Боғча опаси урмадимикан... деб хавотирланиб, кўз ёшлари жилға бўлиб оқди онанинг.

Шарқироқ дарё ҳам сокинлади, тун чўкди... Фақат кўзида ёш она гир-гир югуради тўрт девор ичида... Боласининг истимаси тушса-ю...

Секингина ухлаётганингда ёнингга келиб устингга кўрпани ёпди... Яна кўнгли бўшади... “Ким билан муштлашдинг-а, болам?”...

Фақат сен йиғлама ўғлон! Онанг сен учун тоғларни талқон қилади. Фақат ожизлигингни ўзи ҳам тан олмай қалбидагина йиғлайди... Аммо бу қалб ёшлари қип-қизил негадир...

Тўйингда ҳам кўз ёш қилади ОНА! “Бўлди-да!” дейсан жеркиб...
Бу бахт ёшимикан – зилол булоқлар сувидек...

Фарзандини қучоқлади она: “Ўзимнинг соғинганларим” деб тўйиб-тўйиб ҳидлади неварасини...
Яна кўз ёшми?! Муштипаргинам, ОНАМ...

Зебинисо Аҳмедова

«ФАРЗАНД ТАРБИЯСИ» китобимдан лавҳа.

Психологдан Консультация олиш учун қуйидаги тел. рақамларга мурожаат қилинг:
Тел: +998908055580
Тел: +998909444612

Каналга уланиш:
» @ZebinisoPsixolog

... ва инфо канал:
» @ZebinisoAhmedova