Альберта ҳукумати яна тўполон ичида қолди. Ўтган декабрь ойид | Замбаракнинг ўқи
Альберта ҳукумати яна тўполон ичида қолди.
Ўтган декабрь ойида Альберта бош вазири Даниэла Смит хоним ОАВга интервью берди. Интервьюда журналист бир йил аввал ковид чекловларига қарши қурол билан намойишга чиққанлар устидан бўлаётган тергов ҳақида сўраган (намойиш қилиш мумкин, аммо қурол билан эмас). Шунда бош вазир прокурорлар билан алоқада бўлиб тургани, гумондорларга осон жазо сўраганини айтган.
Шундан кейин жамоатчилик тўполон бошлади. Чунки, қоидага кўра, ҳукумат прокуратура ишига аралашмаслиги керак. Аралашув прокурорларнинг холис ишлашига халақит бериши мумкин.
Шов-шувдан сўнг бош вазир хоним интервью давомида гапида чалғиганини, прокурорлар ишига аралашмаганини айтган.
Бу ёлғонга чидаб тура олмаган ҳукумат воизи ОАВга ҳукуматнинг прокуратурага ёзган имейлларини сиздирган. Журналистлар мактубларни ўрганиб чиқиб, бугун мақола чоп этишди. Мақолада айтилишича, сиздирилган имейлларда ҳукумат амалдорлари бир неча марта прокурорлар билан гаплашган ва улар ишига аралашган.
Мақола чоп этилишидан бир соат ўтар-ўтмай бош вазир яна раддия берди. У прокурорлар билан гаплашмаганини, балки унинг ёрдамчилари унга айтмай прокуратура билан мулоқот қилганини таъкидлади.
Интернетдаги фикрларга асосланиб шуни айтишим мумкинки, бош вазирнинг гапига ҳеч ким ишонмаяпти. Айнан шу мавзуда у бир неча марта ёлғон гапирди.
Бундан ташқари Даниэла хоним унинг (украиналик) буваси коммунистик режимдан қочиб, Канадага келганини айтди. Кейин аниқланишича, бош вазирнинг буваси Канадага СССР ташкил этилишидан аввал, коммунизмдан аввал Украинадан кетиб қолган экан.
Бошқа бир сафар бош вазир унда ҳиндулар қони борлигини даъво қилган, аммо бу гапи ҳам ўз тасдиғини топмаган.
Ишқилиб, бош вазирнинг таги қимирлаб қолди. Нафақат аҳоли, балки унинг партиядошлари ҳам парда ортидан унга қарши қадамлар қўйишни бошлагани ОАВга сиздирилмоқда. Ажабмас, бу жинни амалдор ўрнига яхшироғи келса…
Нима бўлган тақдирдаям, май ойида сайлов. Қаттиқ ҳаракат қилмасак, кунимиз яна демагог консерваторларга қолади.
@zambarakning_oqi
