ЎҚИТУВЧИ ҚЎЗИҚОРИН ЭМАС Содир бўлган воқеанинг асл | Xalq ta'limi xodimlari | RASMIY KANAL
ЎҚИТУВЧИ ҚЎЗИҚОРИН ЭМАС
Содир бўлган воқеанинг асл сабабини билмасдан туриб унга муносабат билдириш ақлдан бўлмайди. Аммо, бухоролик ўқитувчининг нима учун ўқувчиларнинг ҳаммасига танбеҳ бергани аниқ бўлмасдан туриб ижтимоий тармоқларда ўқитувчининг ўзи аёвсиз “калтакланди”. Охир оқибат эса ишдан бўшашга мажбур бўлди. Ниҳоят, ўқитувчининг ҳаракатларига “Замон” ахборот дастури ойдинлик киритди. Ёзма ишдан қониқарли баҳо ололмаган ўқувчиларга бир чеккадан танбеҳ берган экан.
ОТА сифатидан муносабатим: Ўқитувчи бесабаб эмас, яхши ўқимагани учун болаларимизга дакки бераркан, бундан миннатдор бўлишимиз лозим эмасми? Аслида ота - она бера олмайдиган таълимга қўшиб – ота - она бериши мажбур бўлган тарбияни ҳам устози бераётгани учун унга бошимиз ерга теккунча таъзим қилишимиз керак эмасмиди? Рўзғор, турмуш ташвишлари билан бир марта силаб қўйишга қўлингиз тегмаган болангизнинг бошини устози минг марта силаб, бир марта шапатлаб қўйгани учун дунёга жар солиш шартмиди? Пуллик репититор калтакаласа – яна бир имкон беринг,дея устига пул қўшиб берамизу, оддий ўқитувчи дакки берса ижтимоий тармоқларда сазойи қилиб, уни ишдан бўшашга мажбур қилиш АДОЛАТДАНГМИ?
ПЕДОГОГ сифатида муносабатим: Бу ҳаракат педогогик қоидаларига тўғри келмайди, дея жар солишди. Ғарб қаричи билан ўлчанадиган бу қоидалар бизнинг шароитга, вазиятга тўғри келмай қолган пайти ўқитувчи бечора нима қилсин? Бу қоидаларни ўзгартирадиган, ота-боболаримиз орасидан буюк алломаларни етиштириб дунёга устун қилган - шарқ педогогик қоидаларига ҳам назар ташлайдиган пайт келмадими?
ҲУҚУҚШУНОС сифатида муносабатим: Айрим раҳбарларимизнинг бундан бешбадтар ҳаракатлари учун битта узр, ҳайфсан, интизомий чора, синов муддати, борингки, нари борса иш ҳақининг йигирма бараввари миқдорида жарима қилиниб ишда қолдирилаётган бир пайтда миллат устозининг туғридан-тўғри ишдан бўшашга мажбур бўлганини нима билан изоҳлаймиз? Мен ҳурмат қиладиган бухоролик адлиячилар орасида устознинг ҳуқуқини ҳимоя қилаоладиганлари топилади, албатта.
ЖУРНАЛИСТ сифатида муносабатим: Ўқитувчини бутунлай оқламоқчи эмасман. Негаки, журналист ҳар қандай вазиятда ҳам холис бўлиши лозим. Аммо, ушбу воқеани ёритаётган, сарлавҳа олдига “Даҳшат”, дея таъкид қўйиб, бир-биридан даҳшатли, “Ўқувчиларни калтаклаш урфга кирдими?” сингари сарлавҳалар қўйиб оммани нашрига жалб қилиб очко тўплаётган блогер-у, журналистларга қаршиман. Негаки, ҳар бир сарлавҳа, мақола ортида давлат обрўси, миллат шаъни ётганини ҳам унутмаслик лозим.
Мактаб, ота-оналар, нари борса ҳокимлик миқёсида кўриб чиқилиб, чора кўриладиган вазиятларнинг жаҳон миқёсида шов-шув қилиниши – давлатимиз обрўсига ҳам, миллатимиз шаънига ҳам тўғри келмайди. Айниқса, хориж инвесторларининг бутун сармояси ўзбек таълимига қаратилаётган бир пайтда. Президентимиз саъй ҳаракати билан нафақат Туркий давлатлар, балки дунё миқёсида Ўзбекистон Дипломатия Мактабига айлантирилаётган бир вақтда.
ХУЛОСА: Ўқитувчи қўзиқорин эмаски ёмғирдан сўнг пайдо бўлиб қолаверса ва ҳоҳлаган пайти юлиб улоқтираверсак. Сал кенгроқ фикрлайлик!
Бухоро вилояти халқ таълими бошқармаси вазиятни атрофлича ўрганиб, интизомий чора ёки синов муддати билан Бухоро шаҳридаги 4-мактаб ўқитувчисини ишга тиклайди, деган умиддамиз. Менинг фикримга ота-оналар ҳам, кенг жамоатчилик ҳам қўшилишига ишончим комил!
Мирзабек ЖАПАҚОВ, ҳуқуқшунос журналист.
https://t.me/ustozlar_uchun
