Импорт иккинчи ой кетма кет қисқартирилмоқда, лекин олтинсиз э | bakiroo

Импорт иккинчи ой кетма кет қисқартирилмоқда, лекин олтинсиз экспорт ҳам ўсишдан тўхтаган

Маъмурий ва бюрократик йўллар билан импортга қўйилаётган тўсиқлар статистикада ҳам акс эта бошлаган.

Апрель ойида жами импорт 2 941,0 млн.долларни ташкил этган. Мартда бу кўрсаткич 3 151,1 млн.доллар, февралда эса 3 205,7 млн.доллардан иборат бўлганди.

Лекин импортнинг қисқариши олтинсиз экспортга ҳам таъсир кўрсатмай қолмаган. Апрелда 1 334,2 млн.долларлик олтинсиз экспорт юз берган (мартда 1 380.6 млн.доллар). Атайин, таҳлил қилишга имкон қолдирмаслик учун юзаки тақдим этиладиган статистикамизда уран ва мис турли моддаларга яширингани ҳисобга олинса, асосий уч стратегик хом ашёсиз экспорт ўтган йилнинг тегишли даврига нисбатан ҳам яққол камайишда бошлаган ҳам бўлиши мумкин. Импортни маъмурий бўғиш орқали экспортга ҳам чалқанча зарба бериш касаллигини 90- йиллар ва 2000 йилларда бошдан кечирганмиз. Бу учинчиси.

Францияга экспортимиз, афсуски, яна секинлашиб қолган (уран).

Яқин қўшнилар Қозоғистон ва Тожикистонга ой ва йил қирқимида экспорт қисқаришда давом этмоқда.

Газ экспорти 6,9 млн.долларгача қисқарган бўлса, газ импорти 102,6 млн.долларни ташкил этган. Нефть ва нефть маҳсулотлари импорти ҳам шиддат билан ортиб бормоқда (апрелда ҳам март рекордига яқин 241,4 млн.долларлик импорт рўй берган). Аянчлиси, ёқилғида импортга қарамлик фақат бир мамлакатга, шимолдаги босқинчи давлатга қарамлик ортиши билан кучайтирилмоқда, ҳа, айнан мақсадли равишда кучайтирилмоқда.

Автомобиль импортига тақиқ ва чекловлар ўз кучини кўрсата бошлаган. Апрелда 217,9 млн.долларлик автомобиль импорт қилинган. Солиштириш учун, нотариф тақиқлар кучга кирмаган январда 398,5 млн.долларлик автомобиль импорт қилинган эди.