Мустақиллиги ва ваколатлари чекланган Энергорегулятор газ маса | bakiroo

Мустақиллиги ва ваколатлари чекланган Энергорегулятор газ масаласига аралаша олмайди

Ҳукумат янги тарифлар кучга киришидан бир кун аввал, ўз қарори билан Энергетика бозорини ривожлантириш ва тартибга солиш агентлиги тўғрисидаги низомни тасдиқлаган.

Низомга кўра, Агентлик бевосита Вазирлар Маҳкамасига бўйсунади ва фаолияти юзасидан ҳисобот беради. Агентлик Ойбек кўчаси, 26-уйда жойлаштирилган. Худди шу манзилда Энергетика вазирининг биринчи биринчи ўринбосари раҳбарлик қиладиган Ўзатом агентлиги ўтиради. Яъни феълан Энергорегулятор нафақат ҳукуматга, балки Энергетика вазирлигига ҳам техник-хўжалик вертикалида бўйсундирилган.

Ваколатларда "чупран" қилинган Энергорегулятор газ масаласига ҳам аралаша олмайди, фаолият ва назорат масалалари фақат электр энергияси билан чеклантирилган. Энергетик баланси газга таянган ва 80% электр энергияси газ воситасида ишлаб чиқариладиган Ўзбекистон учун бу жуда ғалати ҳолат. Шунчалар ғалатики, энг охирги дилетантларда ҳам бу бозор томон қўйилаётган қадам ўлароқ ишонч уйғотмайди.

Икки йил аввалги режаларга кўра, Энергорегулятор ҳукумат таркибига кирмайдиган, Ўзбекистон Республикаси Президенти ва Олий Мажлисига ҳисобдор орган сифатида ташкил этилиши керак эди. Амалга келганда, Энергетика бозорига кириб боришимиз учун бизга росмана мустақил ва ваколатли Энергорегулятор эмас, навбатдаги формал тузилма рўпара қилинмоқда. Бу кетишда Энергетиканинг кўринмас устозлари парда ортидан туриб, шимолдаги оғалари билан Ўзбекистон мустақиллиги ва энергетикасини пароканда қилиш билан боғлиқ схемаларини давом эттираверишади.

Эслатиб ўтамиз, янги тарифлар эълон қилинишидан аввал ҳам, эълон қилинганидан кейин ҳам биронта юқори мартабали энергетик расмийси, кўринмас устозлариям, уддабурон шогирдлариям жамоатчиликка юзини кўрсатишгани йўқ.