Кеча уй тозалаётиб Шерали Жўраевнинг “Эй Сорбон” қўшиғини бала | Quvnoq Dialoglar

Кеча уй тозалаётиб Шерали Жўраевнинг “Эй Сорбон” қўшиғини баланд қўйволдим. Қизимга ёқмади:

— Ойии, қанаққиб эшитасла шунақа зерикарлии ашулалани?

— Зерикарлимас, қизим. Эртак айтяпти-ку.

— ???

— Тасаввур қилки, чўл. Ҳов анунда Қизилқумга бордикку, тахминан шунақа чўл. Фақат ёз, иссииииқ. Карвон кетяпти. Унда бир маликани бошқа юртга келин қилиб олиб кетишяпти. Карвон ёнида маликага ошиқ йигит унга етиб етолмай кетяпти. Улгурмаяпти. Йигит чарчаган, чанқаган, лекин маликани кўздан қочиргиси йўқ, иложи борича кўпроқ унга қараб олгиси келяпти. Шунда у Карвонбошидан илтимос қиляпти, секинроқ юр деяпти.

Қилма фиғон, эй Саъдиё, ҳеч арзимас ул бевафо,
Тоқатни қўймас бу жафо, ақлу имоним борадур.

— Бевафо нима дегани?

— Айтган сўзида турмайдиган дегани.

— Обещалка экан-да малика?

— Шунақа!

— Мдаа. Грустная сказка.

— Бу “сказка”ни тўрт даҳо 800 йил давомида яратган.

—. Қандай?

— 800 йил олдин яшаган Саъдий Шерозий форс тилида ғазал ёзган. 20- асрда бошқа бир даҳо — Аҳмад Зоҳир деган афғон қўшиқчиси уни қўшиқ қилиб куйлаган. Кейин Шоислом Шомуҳамедов деган ўзбек таржимони ғазални форсийдаги гўзаллиги, мусиқаси ва ширасини сақлаб, чиройли қилиб ўзбекчага таржима қилган. Кейин яна бир даҳо — Шерали Жўраев куй басталаб, айтган. Шеър рус ва бошқа тилларга ҳам ўгирилган. Чунки Аҳмад Зоҳир айтган қўшиқ дунё даражасидаги хитга айланган….

———
Бугун ишдан келсам қизим қулоқлик тақиб, қўшиқ тинглаб хиргойи қилиб юрибди:

“Эй сорбон,
Ммм мммм мммммм...”

— Ойи, сиз манга бу ашулани юқтирдиз!

— Яхши-да, “битс-битс”ларингдан сал бошқачароқ қўшиқлар ҳам юқиб турсин, иммунитетга фойда))

#дидтарбияси

Сизда ҳам қувноқ диалоглар бўлса, юборинг: @shahnozchatbot

Каналга уланиш: @quvnoqdialog