Чот Робин Гудлари Аслида фоҳишалик, бузуқлик нафақат муқаддас | platforma.uz
Чот Робин Гудлари
Аслида фоҳишалик, бузуқлик нафақат муқаддас динимизда, балки оддий инсоний мезонлар нуқтаи назаридан ҳам қора мавзу. Лекин у бор. Ҳатто, жамиятнинг энг элитар қатламида ҳам бу классик, аксилахлоқий нормага иштиёқ ҳеч қачон сўнмаган.
Бу — улуғларимиз ва авлиёларимиз кўп уқтирган нафс билан боғлиқ. Нафсни "ўлдириш", ундан устун келиш эса авлиёликнинг бир шарти, дейиш мумкин.
Бироқ орамизда бундай журъатлилар жуда кам. Шу боис кўпам авлиё қидириб, жиғибийрон бўлиш нормал гап эмас.
Бизга ўзини жуда сипо кўрсатадиган сиёсатчилар, зиёлилар, ақл эгалари шу иш билан шуғулланмайди, бу кўчага кирмаган, деб кафолат бериш фавқулодда қийин ва жуда баҳсли масала.
Бир пайтлар британиялик илоҳиётшунос Тимоти Уинтер бу ҳақда шундай ёзганди: "...Сиёсатчилар ўз шармандаликлари билан бошқаларга ўрнак бўлмоқда: очиғини айтганда, президент Клинтоннинг шаҳватпарастлик билан боғлиқ ўз қилмишларини тан олиши зерикарли ҳодисаларнинг ипга тизилган сўнгги мунчоғидир. Бу эса сиёсий арбобларнинг ахлоқий ҳаёт борасида бошқаларга намуна бўла олмаслигини кўрсатади. Овал кабинетда, ҳар бир вазир ва парламент аъзосининг кабинетида бизга керакли яширин жиноят белгилари стол тортмасида туради ва уларнинг ҳар бир зерикарли хат ёзиш лаҳзасига лаззат бахш этади. Бу ҳол уларнинг, ўзини сипо тутишига қарамай, бир пулга қиммат одам эканини тасдиқловчи тартибсизликдир... "
Албатта, Ғарб сиёсий элитаси ва кибор жамияти ҳақида айтилган ушбу дашномга тўла мулоҳазаларни бизнинг жамиятга нисбатан ҳам қўллаш, афсуски, мумкин.
Умуман олганда, ушбу муаммо барча даврлар ва жамиятлар учун ўзига хос "бошоғриқ" бўлиб келган.
Лекин мен ҳозир бошқа бир нарса ҳақида гапирмоқчиман. Яъни кейинги пайтда, қисқа оралиқда интернетнинг ўзбек сегментида айнан фоҳишалик ва беҳаё лавҳалар билан боғлиқ шов-шувлар ҳақида.
Олдинроқ депутат аёл, ундан сўнг анави талаба қиз... Мени қизиқтирган нарса шу бўлдики, шу аёлларнинг ортидан, уларнинг тўшаги устига камера кўтариб бораётганларнинг аксарияти эркаклар, дирдай-дирдай йигитлар. Тўшак устидаги даъвоси ҳам қизиқ: "биз фоҳишабозликка қарши курашяпмиз..."
Мен ҳам сиз каби фоҳишаликни оқламайман. Лекин барибир беш-олтита эркакнинг камера кўтариб бир ожизанинг чотини пойлаб юришни, уни тутиб олиб, худди Ватанга бостириб кираётган хавфли рецедевистни ушлагандай ўзини мағрур тутиб , ғўддайган, бошини гулчамбарга чўзгандай керилиб тушган видеолавҳаларини интернетга жойлаб, оломондан рағбат кутаётганини тушунмайман.
Энг қизиғи булар ичида давлат одамлари, ички ишлар ходимлариям бор. Хўп, фуқарони ножоиз иш устида ушлабсан, қонунга зид келган ҳаракатлар учун қонунларимизда жазо борми, бор. Марҳамат қилиб уни терговга топшир, беҳаёлиги, қонунбузарлиги учун жазосини олсин. Бир ҳисобдан бундай ишларни қайсидир жиҳатдан оқлаш ҳам мумкиндир. Масалан, шармандали ҳолатни кўриб, бошқалар хулоса чиқарар, қабилида.
Билмадим, фоҳишаликка жуда кескин чоралар кўриладиган ислом давлатларида ҳам бу иллат батамом йўқ бўлган, деган ахборотни ҳали ўқимадим.
Мени ўйлантираётган яна бир сабаб бор. Бу ушбу жамиятимизда азалдан бўлиб келган (гарчи яширин бўлсада) иллатни сув юзига олиб чиқаётган сабаблар. Бунга мисол қилиб, ўзгадан ўч олишнинг разил йўли, канал ва блогчаларнинг ўз пиари йўлидаги енгилтак ҳаракати, деган омилларни келтириш мумкин.
Аммо ҳаммасидан ҳам муҳими шуки, жамият чот ва иркит ишлардан бошқа муҳимроқ масалалар ҳақида ўйлашни, муҳокама қилишни ўрганиши керак, назаримда.
Камера кўтариб чопиб юрган чот Робин Гудлари энди лавҳаларини интернетга эмас, куч тизимларига топширса, улар эса бунга қарши кескин кураш очса... Биз ҳеч қачон шу ўзимиз беҳаё лавҳалар, аксилахлоқий, негатив сюжетлар жойлаётган интернет тизимини болаларимиз ҳам кузатиб боришини эсдан чиқармаслигимиз керак, жаноб Робин Гудлар!
@t.me/platformauzb
