2022-09-13 10:03:57
Қандай мафкура хавфлироқ?
а) Мафкура ахлоқий принципга асосланган бўлиши мумкин.
б) Мафкура тарихий тараққиёт ва унинг муайян йўналишда қонуний ривожланиши ҳақидаги ишончга таяниши мумкин.
Биринчи турдаги мафкуралар тарихий фактларни ҳисобга олмайди ва принципларни абстракт шаклда муайян эътиқодларга таянтиради. Масалан, барча инсонлар тенг бўлиб туғилади, деган ишончни олайлик. Бу оддий ишонч, факт эмас. Аксиома ёки постулат сифатида олинган (динда янада фундаменталроқ бошқа бир ишончдан келиб чиқиши ҳам мумкин, мен бу ерда секулар мафкура ҳақида гапиряпман). Қолган барча қоидалар ана шу ишончдан мантиқан келтириб чиқарилади. Бу ишончнинг ўзи бошқа бир ишончнинг мантиқий хулосаси эмас, балки ўзи барча мулоҳазалар бошида туради.
Иккинчи тур мафкуралар тарихий тараққиёт, тақдир, кураш ва ғалаба каби ишончларга асосланади. Бу турдаги мафкуралар учун алоҳида инсонларнинг бахти мақсад эмас, балки барча одамлар тарихий ривожланиш йўлидаги воситалардир. Улар турли томонлар (синф, миллат, дин, давлат) ўртасида давом этажак курашда қурбон қилинади ва бу кураш бир томоннинг мутлақ ғалабаси билан тугайди. Бу ерда ахлоқий принциплар хаёлий тарихий "қонуният" ёки "мақсад" рўёбга чиқишига ёрдам берсагина қабул қилинади. Орий ирқнинг оламий онг тараққиётидаги пешқадамлигини ва ғалабасини таъминлаш нацист мафкура учун алоҳида одамлар ҳаётидан муҳимроқ саналган. Марксизмнинг айрим талқинига кўра, синфсиз жамият пайдо бўлиши тарихий тараққиётнинг пировард мақсадидир ва бу мақсад рўёбга чиқиши учун ишчи синфи курашни ғалаба билан ниҳоясига етказади. Бу кураш ва унинг самараси ниҳоятда буюкдир ва шу боис миллион одамни қурбон қилса арзийди. Ёки қиёматга яқин муайян тур диннинг бошқалар устидан ғалаба қилиши ва бу тақдир эканлиги ҳақидаги ишончни олайлик. Масалан, қиёматга яқин Шом диёрида кофирлар ва мусулмонлар ўртасида катта жанг бўлиши ва унда мусулмонлар ғалаба қилиши ҳақидаги ишонч, ёки Исонинг қиёматга яқин қайтиб, христианларга раҳнамо бўлиши, курашни ғалабага етказиши ва бунга инсонлар тайёргарлик кўриб қўйиши кераклиги мафкурага асос қилиб олинганда, алоҳида инсонлар бу йўлда қурбон қилиниши мумкин.
Карл Поппер ана шу иккинчи турдаги мафкураларни
"историцизм" деб атаган эди. Уларнинг муҳим хусусияти тарихий тараққиёт қонунларини кашф этгани ва башоратни рўёбга чиқаришга интилишидир.
Либерализм ҳам мафкура. Аммо у тарихий тараққиёт ҳақидаги тушунчадан эмас, табиий ҳуқуқ ҳақидаги тушунчадан келиб чиқади. Унга кўра, инсонларнинг яшаш, эркинлик ва мулкка бўлган ҳуқуқи табиий ҳуқуқ саналиб, ҳатто давлат ҳам унга даҳл қила олмайди. Даҳл қилган давлат легитимлигини йўқотади. Бу назария индивидуализмга йўқ очади ва бутун жамиятнинг эмас, балки ҳар бир инсоннинг ҳуқуқини урғулайди. Яъни биз бу томондан келдик, у томонга қараб борамиз демайди, балки аниқ бир принцип олиниб, ана шу принциплар барча соҳаларга татбиқ қилинади. Айрим анархистик, консерватив мафкуралар ҳам шу тоифага кириши мумкин.
Мафкураларни бу тарзда таснифлаганда сиёсий ўнг, сиёсий сўл тушунчалари иш бермаслиги мумкин. Аммо бир жиҳатини ҳисобга олиш керак: Историцистик мафкуралар холистик хусусиятга эга бўлади ва коллективизм кучлироқ намоён бўлади. Принципга асосланган мафкураларда эса партикуларизм ва индивидуализм бўртиброқ туради.
Яна бир жиҳати, историцистик мафкураларда ҳам принцип бўлади, аммо бу принциплар тарихий тараққиёт ҳақидаги ишончга таянса, кейинги турдаги мафкураларда улар шунчаки аксиома бўлади. Бу аксиома ҳар бир инсоннинг бахти ёки энг кўп одамга бахт (утилитар), ҳар бир инсоннинг ўзи мақсад (Кант) каби тушунчалар асосида бўлади.
Либерализм ҳам муайян ёқимсиз оқибатларни келтириб чиқариши мумкин, албатта. Масалан, жамиятда алоҳида шахсларнинг бегоналашуви, ёлғизлик, одамларнинг ҳаётидан маъно кетиб қолгандек бўлиши (чунки муқаддас мақсад йўқда), нотенглик. Аммо барибир бу ҳолат концлагерлар ва гулаглардан кўра яхшироқ.
1.1K views07:03