2022-07-06 05:01:01
ҚОЛМАДИМИ БИЗДА ОДАМГАРЧИЛИК?(Ўзим хақимда шеър)
Очдан ўлмайин деб қолай деб тирик,
Кийикни овларкан арслонлар йирик.
Лек инсон ўлдирур бир-бирин нечун,
Наҳот онгимиздир шу қадар чирик?
Қолмадими бизда одамгарчилик?
Ука, маҳкамага тортур оғани,
Жиян ўмарадир мулкин тоғани,
Бир кун жазолайдир барчасин Ғани*
Қолмадими бизда одамгарчилик?
Қариялар уйин тўлдирган хам биз!
Мехрибонлик уйин бўлдирган хам биз!
Туғдирган хам бизмиз, ўлдирган хам биз!
Қолмадими бизда одамгарчилик?
Хаёт китобидан ўқий бир шингил:
Мерос талашурлар гоҳ опа-сингил,
Кошки шу зар бирла тортсалар енгил
Қолмадими бизда одамгарчилик?
Сотқинмиз, маддоҳмиз, лаганбардормиз,
Мақтов қуёшида эриган қормиз
Қуллар кўп лек қуллар ичра сардормиз
Қолмадими бизда одамгарчилик?
Етимнинг хаққини егувчилармиз,
Тағин МАН МУСУЛМОН дегувчилармиз.
Қўймиз, чўпонга бош эгувчилармиз...
Қолмадими бизда одамгарчилик?
Нафс дарёси чуқур Нил ё Фиротдан,
Орзу юрти улкан Шом-у Хиротдан
Қандоқ ўтадирмиз э, воҳ Сиротдан?
Қолмаганку бизда одамгарчилик!
Абдураҳмон Мешаян@Falsafiy_satrlar
3.8K viewsedited 02:01