Фаросат туркумидан 'Ҳа, ана кўряпмиз, ҳижобдагиларни... '. ' | Зулфия Махмуд
Фаросат туркумидан
"Ҳа, ана кўряпмиз, ҳижобдагиларни... ".
"Ҳа, ана кўряпмиз, рўмоллиларнинг нима иш қилиб юрганини... ".
Тез-тез қулоққа ташланиб қолаётган бундай кесатиқ гапларнинг сабабчилари бор, аслида... Рўмол ўрадингизми, ҳижоб кийдингизми омманинг кўз ўнгида Аллоҳга яқин киши, гуноҳлардан тийилувчи бўлиб кўринишни бошлайсиз. Аммо... баъзи ўралиб юрганлар фақат ва фақат иснод ва ўралиб юрувчилар устидан гап-сўзнинг кўпайишига сабаб бўлмоқдалар.
Эй, ўралиб юрувчи, Аллоҳдан қўрқ!
"Кўп ҳижобдаги аёл-қизлар иштон киймас экан-а? Оёқлари очилиб ётганини кўп кўрдим-да... ".
"Ҳижобдагиларнинг нега ичи кўриниб ётади? Ёпиқ туриши керак эмасми?"
"Шу рўмол ўраган баъзиларни кўрсам асабим қўзийди. Бир тонна бўёқни чаплаб, лабини ботекс қилиб олган. Ўралгани қаёққа кетди, энди?"
"Ҳижобдагиларнинг ликиллашини кўриб, ҳижобга киришдан қайтиб қоляпман. Уларнинг қилиқлари кўзимга жуда хунук кўриняпти... ".
"Ўралганлар одмироқ бўларди авваллари... Ҳозир бўлса ялтир-юлтур, шақир-шуқур бўлиб кетишган. Уларни кўрганда энсанг қотади, тавба... ".
"Олдин ҳижоблилар саноқли бўлишарди. Уларнинг ўзларини тутишларига ҳавасим келарди. Ҳозирда кўпайиб кетишди... худди мода учун ўралиб олишганга ўхшашади. Етмаганига видео, расмлари айлангани-айланган... ".
"Бошингни ёпгунча, кетингни ёп. Бошига рўмол ўраб олибди-ю, иштон киймабди. Энди бу нимаси?"
Мен ўз кўзларим билан гувоҳ бўлган воқеани айтаман. Бир куни кўчанинг гавжум жойидан кетаётган эдим. Ёш эр-хотин бир-бирини қўлидан маҳкам ушлаб олганча кетар эдилар. Аёлнинг ҳаммаёғи ёпиқ, ҳатто қўлқоп ҳам кийиб олган эди. Улар мошина йўлдан ўтаётганларида, аёл қора ҳижобини бир тарафини тепага сал кўтариб юришни бошлади. Оёқлар қип-яланғоч эди. Аёл этакларини болдиргача кўтариб силкитиб-силкитиб қўйди. Чала муслиманинг қилиғидан қоқилиб тушишимга сал қолганди. Бу мусулмонлар учун улкан мусибат эмасми?
Эй, ўралиб юрувчи, Аллоҳдан қўрқ!
Ўзингни босиб ол! Кимлигингни ва алал оқибат қаерга боришингни унутма! Ўзингни йиғиштириб ол, ўзингдан кетма! Зеб-зийнатларинг ўзингга буюрсин, ўзингникиларга кўрсатавер! Ич кўрсатувчи "ҳижоб"ларинг билан, ички аъзоларингни қандайлигини билдирувчи уятсиз кийимларинг билан Исломни бузиб кўрсатма! Аввал қандай юрган бўлсанг, шундай юравер! "Мусулмончилик аста-секинчилик", демоқчи бўлсанг адашасан. Бу фақатгина дин душманларининг гапи, холос...
Эй, ўралиб юрувчи, Аллоҳдан қўрқ!
Зулфия Махмуд
t.me/zulfiyamaxmudova
