2022-03-08 06:19:55
Азиз ва муҳтарама онахонлар, қадрли опа-сингиллар!
Сизларни баҳорнинг илк айёми – 8 март байрами билан Халқ таълими вазирлиги номидан самимий муборакбод этаман.
Барчангизга ўзимнинг энг эзгу ва самимий тилакларимни билдириб, ҳамиша оилангиз ва яқинларингиз, эл-юртимиз ардоғида бўлиш бахтини тилайман.
Оила ва жамият устуни, ҳаётимизнинг файзи ва кўрки бўлган хотин-қизларни эъзозлаш, уларга ҳурмат ва эҳтиром кўрсатиш халқимиз учун азал-азалдан буюк қадрият бўлиб келганини ҳеч биримиз ёдимиздан чиқармаймиз.
Сиз гўзал ва бетакрор, азиз аёлларимиз ҳақида жуда илиқ фикрлар айтиш, кўплаб таърифлар келтириш мумкин.
Бу борада Ҳурматли Президентимиз Шавкат Миромонович Мирзиёевнинг
“Сиз, ҳурматли аёлларимиз ўзингизнинг оналик меҳрингиз, ҳаётий билим ва тажрибангиз билан фарзандларимизни турли хавф-хатарлардан асрашда, уларни мустаҳкам иродали, маънавий-интеллектуал жиҳатдан етук, жонажон Ватанимизга садоқатли инсонлар этиб тарбиялашда бундан буён ҳам куч-ғайратингизни аямайсиз, деб ишонаман. Айниқса, қиз болаларни ҳаётга тайёрлаш, уларни замонавий билимлар, касб-ҳунарларга ўргатишда биз аввало сизларга суянамиз” деган сўзлари ҳар жиҳатдан ибратлидир.
Дарҳақиқат, мамлакатимиз ижтимоий-сиёсий ҳаётининг турли соҳаларида хотин-қизларнинг фаол ва ташаббускорлиги, ҳалол меҳнатлари билан ҳаётимизнинг файзли бўлишига ўз ҳиссаларини қўшиб келаётганликлари барчамизни қувонтиради.
Ушбу шукуҳли айёмда катта мамнуният билан, бугун халқ таълими тизимида эзгу ишларимизга камарбаста бўлиб, фарзандларимизга устозлик қилиб келаётган 343 967 нафар хотин-қизларнинг фидокорона меҳнатларини алоҳида эътироф этиб ўтишни жоиз деб биламан.
Азиз опа-сингиллар!
Ақл-заковатингиз, меҳр-оқибатингиз, сабру қаноатингиз билан барчамизга ибрат бўлиб, ёш авлодга билим бериш борасида қўшаётган беқиёс ҳиссангиз ва янги Ўзбекистонни барпо этиш йўлидаги фидокорона меҳнатингиз учун Сизлардан чексиз миннатдормиз.
"Инсон қадрини улуғлаш ва фаол маҳалла йили" деб номланган жорий йилда ҳам олдимизга қўйилган улкан вазифаларни амалга оширишда, аввало, Сизларнинг билим ва маърифий салоҳиятингизга таянамиз.
Ишончим комилки, ҳар бирингиз қайси ҳудудда истиқомат қилишингиз, халқ таълими тизимининг қайси бўғинида ишлашингиздан қатъи назар, юртимизнинг барча жонкуяр аёллари қаторида таълим тизимидаги ислоҳотларни қўллаб-қувватлаб, ҳаётга катта умид билан кириб келаётган ёшларимизга, айниқса, қизларимизга таълим ва тарбия беришдек ғоят машаққатли, аммо олижаноб ишга муносиб ҳиссангизни қўшасиз.
Азиз ва мўътабар онахонлар, мунис опа-сингиллар!
Яна бир бор сизларни ва сиз орқали юртимиз хотин-қизларини, дилбар аёлларимизни самимий табриклайман. Сизларга соғлик-саломатлик, бахту саодат, хонадонларингизга тинчлик, файзу барака тилайман.
Зеро, аёл деган улуғ хилқатда нозик таъб ва буюк қалб, назокатли кўнгил, бетакрор фидойилик ва она жасорати мужассамдир.
Мана шундай фазилатлар эгаси бўлган ҳар бирингизга байрам муборак бўлсин!
Эҳтиром ила,
Ўзбекистон Республикаси Халқ таълими вазири Бахтиёр Саидов
705 viewsКувончбек Каримов, 03:19