БУНДАЙЛАРДАН УЗОҚРОҚ ЮРИНГ Ҳаётимда гўзал йўлни кашф қилдим. | ❄Zemheri Duygular❄

БУНДАЙЛАРДАН УЗОҚРОҚ ЮРИНГ

Ҳаётимда гўзал йўлни кашф қилдим. У ҳакида Қуръонда ҳам келтирилган. Унинг номи "Чиройли кечириш ва нодонлардан юз ўгириш”. Ҳар хил беҳуда баҳсларга киришманг, ғаламис, фитначи, хусуматчилар билан низолашманг, жанжаллашманг. Динингизни, қалбингизни, соғлигингизни, асабингизни яна хотиржамлигингизни йўқотиб қўясиз.

Бирор шу каби инсонни кўрсангиз ёки танисангиз, дарҳол бундайлардан узоқлашиш пайида бўлинг. Хотирангиздан ўчиринг. Ҳаётингизни усиз янгитдан бошланг. Аллоҳ таоло марҳамат қилиб бундай дейди:

"Жоҳил кимсалар (бемаъни) сўз қотганда «Саломатлик бўлсин», деб жавоб қиладиган кишилардир” (Фурқон сураси, 63-оят).

У ҳақида ўйлаб ўзингизни банд қилманг. Қилиқларини гапирманг, эътироз билдирмоқчи бўлманг. Балки унақа одам асло йўқ, деб фараз қилинг. Бу ҳақида Абут Тоййиб Мутанаббий бундай деган:

Нафратлангин ҳасаддан, ҳам ундайдан узок юр.
Низолашма, тортишма, ҳам йўқ қилгин тасаввур.

Атрофингизда бу каби исмларнинг борлиги сизни худди бошқа ташвишларингиз сингари ғамга ботириши керак. Улар билан ўралашиб, овора бўлиб қолманг. Бу сизнинг хотиржамлигингиз, саломатлигингиз гаровидир.

Унутманг, ҳар бир эси паст кимсага раддия беришга масъул эмассиз. Хусусан, нодонга, ҳасадчига, тентак дарозга. Чунки сиз унга бирор чиройлироқ гап билан қаршилик билдирсангиз, у сиздан устун келмоқчи бўлиб ўнта чиройли гапни тахлайди. Аҳмоқона гап айтсангиз, юзлаб кабиҳ гапларни ёғдиради. Ундайларга салом беринг, қочинг. Тинчгина, чалғимай, яшашингизда давом этинг. Бошқани бадном қилиш, учраганни ранжитиш, Аллоҳ бандаларини шарманда қилиш, хатоларини очиш, айбларини кўрсатиш каби хунук ишларни ўзига касб қилиб олган бу каби кимсаларга аралашманг.

“Ниҳоят саодатни топдим“ китобидан.