2022-07-10 17:35:18
Қайнота куёви келса, албатта яхшилаб ишлатмасдан жўнатмас экан. Ҳар келганда ё мошинасини ювдирар, ё узум токларини кестирар, ё ер чоптирар экан.
Қайнона бир куни: "Қўйинг адаси, ундай қилманг! Ахир куёв бўлса. Онда-сонда келса. Уят бўлади ахир..."дебди.
Қайнота: "Нега энди уят бўлар экан? Қизимиз уларни 24 соат хизматини қилса уят бўлмас экан-у, бир ойда бир куёвимни ишлатсам уят бўлар эканми? Нега қизингни қайнонаси: "Бу келин, иш буюрсак уят бўлади", демайди. Итдек ишлатади...", дебди, хотинига жавобан.
Куёв бола ҳам инсофли, ювошгина экан. Ҳар келганда, қайнотасининг бир юмушини бажариб кетишга одатланиб қолибди.
Менга қайнотанинг тутган йўли ёқди. Ҳақиқатда нега энди фақат келинлар, хизмат қилишлари керак? Ёки куёвлар оёқларини осмондан узатиб тушганмилар? Улар фақат зиёфатга, суюқ-қуюққа боришлари керакми?
Шу ўринда бир нарсани ҳам ёзиб ўтмоқчи эдим.
"Ада-ойи бирон юмушингиз йўқми? У-бу ишингиз бўлса айтинг!", деб ўзининг гўзал фаросати билан сўрайдиган куёвларга гувоҳ бўлганман. Хизматдан қочмайдиган куёвлар бисёр. Лекин баъзи тўнкароқ, бефаросатроқ куёвларга шу юқоридака қайнота бўлса, ғиштга қолипдек тушар эди.
Бизда қизларни қулликка тайёрлашади. Қани энди йигитларни ҳам, шундай қилиб қайнота-қайнона хизматига тайёрлашса...
Ота-онасини ташлаб, биратўласига хотини томонга хизматга ўтиб кетганлар у умуман бошқа, алоҳида мавзу. У мавзу билан бунисини аралаштириб юборманг!
Зулфия Махмуд
90 views14:35
Z
