ТОИФА УЧУН ОЛГАН ПУЛЛАРИМНИ ҚАЙТАРИШГА МАЖБУРМАНМИ? Туман пол | YURIST MASLAHATI
ТОИФА УЧУН ОЛГАН ПУЛЛАРИМНИ ҚАЙТАРИШГА МАЖБУРМАНМИ?
Туман поликлиникасида ишлайман. 2020 йил аттестациядан ўтиб олий тоифа олганман. Бироқ яқинда бўлган текширувларда мен томонимдан аттестация ўтиш учун сохта ҳужжатлар тақдим этилган деб топилди. Энди менга тўланган тоифа пулларини қайтаришимни талаб қилишмоқда. Мен қайтаришим шартми? Сертификатни ҳам бекор қилишмоқчи.
ЖАВОБ:
Агар текширувлар натижасига кўра сиз ҳақиқатдан ҳам айбдор деб топилган бўлсангиз унда уларнинг фикрлари асосли деб ҳисоблаймиз.
Чунки Меҳнат кодексининг 279-моддасига асосан иш берувчи томонидан ихтиёрий равишда тўланган, шу жумладан қонунни нотўғри қўлланиш оқибатида тўланган ортиқча иш ҳақи қайта ундириб олиниши мумкин эмас, ҳисоб-китобда йўл қўйилган хато оқибатидаги ортиқча тўловлар бундан мустасно.
Бироқ ходимга у берган ёлғон маълумотлари ёки тақдим этган сохта ҳужжатлари оқибатида тўланган суммалар ундан суднинг қарори ёки ҳукми асосида ундириб олинади.
Энди қаранг! Соғлиқни сақлаш вазирининг 2014 йил 18 декабрдаги 21-сон буйруғи билан тасдиқланган “Тиббиёт ва фармацевтика ходимларини аттестациядан ўтказиш ва уларга малака тоифалари бериш тартиби тўғрисида”ги Низомнинг 38-бандига кўра малака тоифаси сохта ҳужжатлардан фойдаланилган ҳолда олинганлиги суднинг қарори билан аниқланганда сертификат бекор қилинади.
Сертификатни бекор қилиш уни берган аттестация ўтказувчи орган раҳбарининг буйруғи билан амалга оширилади. Бунда сертификат у берилган санадан эътиборан бекор қилинган деб ҳисобланади.
