2022-12-25 17:45:45
Давлатни емирадиган иллатлар кўп. Масалан, непотизм, коррупция, қонунсизлик ва ҳоказо. Лекин булар орасида энг зарарлиси бу коррупциядир. Коррупция фуқароларнинг давлатга бўлган ишончини сўндириб, ватанга бўлган муҳаббат туйғусини ўлдиради. Шу сабабли бу ўта хавфли иллат ҳисобланади.
Янгиликларда бугун фалончи фалон миқдорда пора олаётганида қўлга олинди, каби хабарларни жуда кўп кузатамиз. Ваҳоланки, булар аниқланган ҳолатлардир. Аниқланмаганлари қанча. Шу каби хабарларнинг ўзи мамлакатимизда коррупция нақадар авж олганини кўрсатади. Бизда порахўрлик туғруқхонадаёқ бошланади. Янги дунёга келаётган чақалоқ ҳам бу иллатдан азият чекиб туғилади.
Биздаги энг асосий пора олди-бердиси ишга кириш жараёнида кузатилади, менимча. Чунки иш ўринлари талаш бўлиб турган бир пайтда ҳеч ким қуруқ қолгиниси келмайди. Бу ўринда эса энг жабр чекадиганлар янги битирувчилар ёки талабалар бўлади. Улар фақат “йўталсалар” ишга жойлаша оладилар, акс ҳолда “стаж керак” баҳонаси билан ўринларини бошқага бериб қўядилар.
Аввалроқ рус тили ўқитувчилигини танлаган бир талаба танишим билан суҳбатлаша туриб, ундан порахўрлик иллати ҳақида кам ёзаётганим учун таъна эшиттим. У янги ишга кирган мактабида директор ўринбосараридан бири пул сўраётганини, у эса бермай ўзини олиб қочиб юрганини айтиб қолди (аввалги иш жойидан ҳам айнан шунинг учун бўшаб кетган экан). Гап яна нимагадир бурилди-ю, шу билан бу воқеа эсимдан чиқиб кетди. Бугун Самарқанд ФВ бўлим бошлиғи бир одамни пора эвазига ишга олаётганида қўлга тушгани ҳақидаги хабарни ўқиганимдан кейин ишга кириш нақадар қийинлигини ва пора олди-бердиси табиий ҳоллигини ўйлаб қолдим.
Қаердадир пора олганнинг ҳам, берганнинг ҳам, воситачилик қилганнинг ҳам иши битиб ҳожати чиқиши ва оқибатда мамлакат ҳожатхонага айланиши ҳақида ўқиган эдим. Агар биздаям жараён шу зайлда давом этаверса, бу тез орада “натижасини” беради ва атрофимиздан бадбўйлик анқий бошлайди....
Бизга қўшилинг
Янгийўл ҳақида энг тезкор маълумотлар канали
@YANGI_YANGIYULL
16.1K viewsedited 14:45