#ибратли_ҳикоя Айтишларича, Бухорода бир ёлғиз кампир яшаган | Xushnudbek.uz

#ибратли_ҳикоя

Айтишларича, Бухорода бир ёлғиз кампир яшаган экан. Биттагина эчкисини соғиб, сутидан бир миқдорини ичиб, қолганини сотиб кун кечирар экан. Иттифоқо кечаси ухлаб қолганда, шу эчкисини ўғирлаб кетишади. Кампир арз қилмаган жой қолмайди. Охири амир ҳузурига боради. Амир ундан не арз билан келганини сўрайди.

Кампир нима бўлганини айтади.

— Ия, — дейди амир. — Эчкини қўриқламай, донг қотиб ухлаган экансиз-да, эна!

Кампир жавоб қилди.

— Тўғри, ухлаган эдим, амир ҳазратлари. Лекин сизни уйғоқ деб ўйлагандим. Қаранг-а, сиз ҳам ухлаган экансиз-да!

Амир лол-у ҳайрон бўлиб, боши эгилади. Кампирнинг бир оғиз “сиз ҳам ухлаган экансиз-да”, деган гапи унинг юрак-юрагига бориб етади. Шу биргина жумла амирга ўз масъулиятини эслатиб қўйган эди.


@xushnudbek