2022-11-23 06:32:50
***
Bir onga to'qnashdi sirli nigohlar,
Yana yuragimda mavj urdi sevgi
Unutildi necha yillik qiynoqlar,
Yurakni yondirdi yoqimli sezgi...
Tandirdagi cho'xday qizardi yuzim,
Qo'l kuydirar nonday uzildi nigoh,
Yerga munchoqdayin to'kildi ko'zim,
O'zganing yoriga qaramoq gunoh...
Dil o'lgur ilondek to'lg'ondi bu kech
Xumori tutdimi oh, u ko'zlarni
Telba qalb hijronning tugunini yech,
Endi bog'lolmaysan ayro dillarni...
Aldamchi nigohlar, yolg'on nigohlar
Taqdir o'yinida qildingiz g'irrom,
Sizni deb yuragim to'la yamoqlar,
Ma'nosin yo'qotdi kunlarim tamom...
Sahardan tungacha soyam singari
Ta'qib qilavermang, bo'ldi! Yetar! Bas!
Chaqiring sevgining sulh elchilarin
Yetkazsin vafoli sevgidan bir sas
Sog'inch dard yarasin bitkazolmaydi,
Tashnadek simirdim eng so'nggi sabrim,
U jodu ko'zlarni unutolmaydi
Aybdor yuragim, gunohkor qalbim...
Latofat Amirova
@Zinnurayniy
255 viewsLatofat Amirova, edited 03:32