2022-05-06 13:06:43
ТУН
Тун тугал. Ой ҳарир. Юлдузлар гужум.
Сархуш ҳислар учун очиқдир эшик.
Юрагим тупроққа тисланади жим:
"Бунча соф бўлмасанг, эй она бешик!"
Табиат мавжланар – хилқат хадафи,
Олам – шом авжида гуллаган гузар.
Осмонда энг таниш булутлар сафи
Алланда, арзанда туйғу-ла сузар.
Покиза орзулар ҳоким очунда,
Хаёл манзилига йўл очилган кенг.
Шарт эмас тоғларга сайр этмак бунда,
Гўзаллик сочилган ҳар тарафга тенг.
Кун кириб кетгандир туннинг пинжига,
Дуоси ижобат гўдакдек гўё.
Саратон олдинда, музлик тинчиган...
Апрель ҳавосидек мўътабар дунё.
@Xayrulla_Hamidov_adabiyot
18.8K views10:06