Xayrulla HAMIDOV ijodi /official

2022-07-20 07:06:19 Зўр маруза… Шунақа аччиқ гаплар керак. Ҳақиқатни очиш учун!

@Xayrulla_Hamidov_adabiyot Ochish/sharhlash

2022-07-09 20:28:20 #special
Шеърият вақти...

Хайрулла Ҳамидов Ochish/sharhlash

2022-07-09 16:44:58 Ҳали сен катта бўлмагансан,
болакай!

Ҳали катталарга ўхшаб «одам»га айланмагансан...

Отангга, акангга, боболарингга ўхшаб ваҳшийлик либосини киймагансан ҳали...

Ҳозирча қалбинг фаришталарга яқин...

Шунинг учун, кел, меҳрлашайлик!

Ёвлашгунимизча дўстлашиб турайлик!

Сен мени ўлдиришни ўйламайсан, мен сени ейишни...

@Xayrulla_Hamidov_adabiyot Ochish/sharhlash

2022-07-07 14:48:06 КЕСИШМА

Зоҳиримдан рози бўлолмас ботин,
Ўйларим қочгандир оқиллик билан.
Орзу қилишимга қўймас ҳаётим,
Хаёлим келишмас воқелик билан.

Кўзларим қаърида мантиқ топилмас,
Балким бу ёмондир, балким яхшидир –
Бахтсизлик ҳақида гапириб бўлмас,
Бахт ҳақда ёзишга умрим қаршидир.

@Xayrulla_Hamidov_adabiyot Ochish/sharhlash

2022-06-24 07:58:00 Дилга меҳр туккан жуманг муборак,
Ерда ҳаёт туққан жуманг муборак.
Имкон, имкон, яна имкон улашиб
Қуёш шарқдан чиққан жуманг муборак!

@Xayrulla_Hamidov_adabiyot Ochish/sharhlash

2022-06-22 08:55:10 Сўрадилар:
— Сен дуоси қабул бўладиган кишини биласанми?

Жавоб бўлди:
— Дуоси қабул бўлганни эмас , дуони қабул қиладиганни биламан. Сен Унга кўнгил боғла!

@Xayrulla_Hamidov_adabiyot Ochish/sharhlash

2022-06-18 12:21:28 Кузакда ҳамални излаб чарчадим,
Якунда тамални излаб чарчадим.
Ҳикмату ривоят тошган дунёда
Биргина амални излаб чарчадим.

@Xayrulla_Hamidov_adabiyot Ochish/sharhlash

2022-06-17 09:42:40 ЯПОНИЯ

Осиё. Ханьшу. Ва ўтмишидан
Тинч уммони сари отилар вулқон.
Самурай қасоси. Япон тишидан
Тизилиб оқади маржон-маржон қон.

Химико давридан қоялар ҳам тик,
Чин сори узанган энг кўҳна йўлка –
Кофун дарахтидан узилган баргдек
Дунёдан узлатда яшаган ўлка.

Қайсарлигинг билан сўйла ваҳшатни,
Асука қаҳридан чайқалсин денгиз.
Ўжар сарҳадинда кўриб ваҳшатни
Ортига қайтган-ку, ҳаттоки Чингиз.

Ҳар қарич ерингда ухлайди ғурур,
Хоинлик ҳамонки энг катта иллат.
Болалар кўзи ҳам ёнади мағрур:
“Биз – ўлим-ла мангу курашар миллат!”

Сендан ўлчов олмиш инсон тоқати,
Вабога ҳар саҳар оласан алик.
Ҳар кеча бир хил туш кўриб чиқади
Ҳар битта, ҳар битта хиросималик!

Бугун дунёдаги энг илғорсан сен,
Аммо қонли мозий чалиб турар бонг.
Ўтмишингни эслаб силкинар замин,
Қуёш олов рангда уйғонар ҳар тонг.

Ҳа, қуёш юзида адабий алам,
То ғарбга юз бурар тирнайди хўрлик:
Нечун унинг юзи ол, қонли десам,
Сенинг фожиангдан хабардор шўрлик.

@Xayrulla_Hamidov_adabiyot Ochish/sharhlash

2022-06-15 11:34:09 ЁМҒИР

Мен ёмғирман, самода туриб
Ерни суйган, суюкли тутган.
Булутларнинг қўйнида ғариб
Ўз соатин йилларча кутган.

Мен ёмғирман, оромдан йироқ,
Орзуларга узанган тилак.
Ҳар томчимда кўз ёшча фироқ,
Ҳар сасимга умид чамбарак...

Мен ёмғирман, дардлар измидан
Қувган, қувган мисоли толиб.
Муҳаббатнинг кўҳна исмидан
Мана, келдим бир насийм олиб...

Мен ёмғирман, севаман, дунё,
Покланиб ол ювгиларимдан.
Адирларда яшиллик – гиёҳ
Уйғонажак севгиларимдан.

Мен ёмғирман, дилгир синчалак
Тутиб қолган... қўш қанотлиман.
Дарахтлардан сўра, қанчалик
Қувватлиман, ҳароратлиман!

Мен ёмғирман, ёмонлигим йўқ,
Қўнсам, тоғлар бошин эгарлар.
Кутиб олар юраги санчиқ
Дарёларим – содиқ жигарлар.

Мен ёмғирман, ҳар гулга қўнган,
Ҳар мунглуни эзиб йўқлагум.
Ғамларингни айтавер менга,
Сен учун ҳам қўшиб йиғлагум.

Ҳа, йиғлагум, тамомий меҳр
Сувидирман. Нидо этяпман --
Ўзим билан сен томон, ахир,
Ижобатлар олиб кетяпман.

@Xayrulla_Hamidov_adabiyot Ochish/sharhlash

2022-05-30 10:56:06 ЖИМ ЁТАР

Залворли сукунат! Дунё юкидан
Эзилиб не давру даврон жим ётар.
Сайду сайёдларнинг вахшийлигидан
Яйраб юролмайди – жайрон жим ётар.

Ҳаддан ошиб кетсанг тўкин чоғларда,
Оловдек ўртангай қалбинг доғларда...
Ҳаттоки пурвиқор сокин тоғларда
Паймонасин кутиб вулқон жим ётар.

Эслаб кўр – не сабаб икки Инсонни
Ҳайдаб чиқардилар, қўшиб шайтонни...
Нафс ёмон, бир қара, шўрлик сичқонни
Етаклаб бормоқда... қопқон жим ётар.

Эй дўстим, шериксиз чиқмагил овга,
Не ҳам қилолардинг бир ўзинг ёвга.
Ҳар инсон мухтождир бошқа бировга,
Ёйсиз қолса кор йўқ – камон жим ётар.

Закий кўзлар учун ёруғдир кеч ҳам,
Ҳаддини билгайдир, ошмайди ҳеч ҳам.
Ақлли сайёдлар шошмайди ҳеч ҳам,
Ўлжаси ўтлайди... Арслон жим ётар.

Хайрулло, бас, етар, ўйнадинг-кулдинг,
Дунёнинг энг сирли ўйинин билдинг.
Шовқин-сурон қилма, уч кунга келдинг,
Бировнинг уйида меҳмон жим ётар.

@Xayrulla_Hamidov_adabiyot Ochish/sharhlash