2022-08-29 15:37:10
“Super kontrakt” haqida ayrim ma’lumotlar
Kecha super-kontrakt narxi qanday hisoblanishi haqida ma’lumot bergandim. Bugun boshqa jihatlariga e’tibor qaratmoqchiman.
Super-kontrakt narxini qanday hisoblayman?
Batafsil javob bu erda:
https://t.me/xushnudbek/15751
Super-kontrakt bilan bir qatorda oddiy kontrakt ham qo‘shib to‘lanadimi?
Yo‘q, unaqa emas. Birinchi yili faqat super-kontrakt summasi to‘lanadi, oddiy (bazaviy) kontrakt qo‘shib to‘lanmaydi. Ikkinchi yildan boshlab esa faqat oddiy kontrakt to‘lanadi, super-kontrakt to‘lanmaydi.
Super-kontrakda o‘qish uchun necha ball olish kerak?
Farqi yo‘q. Testga kirgan bo‘lsa, kifoya. 1 ball olgan bo‘lsa ham, qo‘shimcha kontraktda o‘qishi mumkin. Faqat narxi baliga qarab farq qiladi.
Super-kontrakda o‘qishni xohlaganlar qachongacha ariza berishi kerak?
Eng avvalo aytish kerakki, hali super-kontrakt uchun arizalar qabul qilinmayapti. Ertagayoq OTMga yugurib borishingiz shart emas. Arizani sentyabrь oyida, o‘qishlar boshlangach berasiz.
Arizalar 1 oktyabrga qadar qabul qilinadi. Kim birinchi ariza bersa, o‘sha birinchi qabul qilinadi, degan qoida yo‘q. Talabgorlar to‘plangan ballga qarab tartibga solinadi, ya’ni avval yuqori ball to‘plaganlarga imkon beriladi.
Ariza berish uchun OTMga borish kerakmi?
Yo‘q. O‘tgan yildan boshlab super-kontrakt uchun arizalar onlayn qabul qilinadigan bo‘ldi. Siz uyingizdan chiqmagan holda internet orqali ariza yuborasiz. Buning uchun OTMga kelish, kimnidir kabinetida navbat kutish, kimlargadir iltimos qilish shartmas. Ariza qabul qilinadigan sayt ishga tushgach, qo‘shimcha xabar qilinadi.
O‘qishga kirganlar boshqa yo‘nalishga super-kontraktni tanlay oladimi?
Masalan, birinchi va ikkinchi yo‘nalishga bali etmadi, lekin uchinchi yo‘nalishga o‘qishga kirdi. Abiturient uchinchi yo‘nalishda o‘qishni istamay, birinchi yoki ikkinchi yo‘nalishda super-kontraktda o‘qiy oladimi?
Bu masala hozircha ochiq turibdi, joriy yilgi tartib tasdiqlanmagan.
O‘tgan yili abiturient o‘zi tanlagan BIRINChI yo‘nalishga kira olmagan, lekin 2, 3, 4 yoki 5-yo‘nalishlardan biriga o‘qishga kirgan bo‘lsa, unda o‘z xohishi istisno tariqasida bilan BIRINChI tanlagan yo‘nalishida super-kontraktda o‘qishiga ruxsat berilgan edi. Bu istisno 2, 3 yoki 4-yo‘nalishga taalluqli emas. Ya’ni 3 ga kirgan bo‘lsa, 2-yo‘nalishda super-kontraktda o‘qiy olmasdi, faqat BIRINChIga ruxsat berilgandi. Joriy yilgi tartib tadsiqlansa, qo‘shimcha xabar beriladi.
O‘qishga kira olmaganlar istalgan beshta yo‘nalishda super-kontrakt qila olishadimi?
Ushbu masala ham hozircha noma’lum. Aniq bo‘lgach, xabar beriladi. O‘tgan yili beshala yo‘nalishiga ham o‘qishga kira olmagan abiturientlar istalgan beshta yo‘nalishdan birini tanlab, super-kontraktda o‘qishiga ruxsat berilgan edi.
@xushnudbek
Facebook | Instagram
Telegram | www.uzjoku.uz
1.2K views12:37
O
