#Баъзи_ҳақиқатлар... Биз ёмон деб ўйлаган ишларнинг ортида | Ummu Zaynab Ummu-Azizaxon Ismoilova ijodi kanali
#Баъзи_ҳақиқатлар...
Биз ёмон деб ўйлаган ишларнинг ортида нима бор?!
Агарда билиб билмасдан қандайдир айб қилгудек бўлсангиз, сизнинг атрофингизда одамлар ўз-ўзидан сараланишни бошлайди:
"Хатони ўзинг қилдинг, баттар бўл!" деб ошкора мазаммат қилгувчилар....
Шу гапни ичида айтиб, йўқ бўлиб қоладиган ғойибмирзалар...
Айблашдан йироқ, индамасдан қўллагувчилар...
Ёки ҳеч ким...
Агар синовли кунларда атрофингизда "баттар бўл!" дегувчиларни учратсангиз, бир куни ёруғликка чиққанингизда бу воқеаларни албатта кулиб эслайсиз: ўша одамлар ўзлари айб қилганида уларга худди ўзидек муомала қилмасликка ҳаракат қиласиз...
Агар машаққат сизники бўлганда, атрофингизда ҳеч нима демасдан, бирдан ўзидан-ўзи йўқолиб қоладиганларни сезсангиз, "иншааллоҳ, бу кунлардан чиқиб олсам- уларга ҳеч қачон қилганларини қайтармайман!" деб дилингизга тугиб ҳам қўясиз...
Чунки уларга мардликни кимдир ўргатиши кераклигини биласиз...
Агар ўша оғир пайтда- сизга индамасдан яхшилик қиладиган одамларни учратган бўлсангиз, демак-ки Аллоҳ таоло вакил қилган яхши одамлар сизга томон келиши қадарингизга битилган бўлган...
Агар-да машаққат чоғида атрофингизда ҳеч кимса қолмаган бўлса- билинг-ки, бунинг ҳам ўзига яраша хикмати бор!
Ўша қоронғу кунларда озроқ қийналасиз, лекин...
Кейинчалик бежизга ёлғиз қолдирилмаганингизни тушуниб етасиз...
Демак, ўзингизда нимадир ёки қанақадир яширин куч бўлган ёки сабрдан синалишингиз керак бўлган...
Биз Аллоҳдан нимани сўрашимиз керак?!
Муаммо ёки синов қаҳрамонларни, қўрқоқларни, содиқлар-у ҳиёнатчиларни ёки ўзимизнинг ички кўникмаларимизни юзага чиқариш учун содир бўлади.
Омон-омон замонларда топмаган ҳулосаларингизни, кучингиз -у, қадр-қийматингизни машаққатли ва синовли кунларда қўлга киритасиз.
Ҳеч нарса аслида ёмонликка эмас...
Сиз Аллоҳ таолодан нима бўлганда ҳам, ўша ваъдани- яъни бир оғирчиликдан сўнг албатта енгилчилик ўзингизга жорий бўлишини сўранг...
Ўзи сизни ташлаб қўймасин!
Азизахон Исмоилова
@Ummuzaynabummuijodi
