bakiroo

2024-04-30 14:00:03 Сўмдаги кредитларнинг фоизи пасайишни бошлагандек, депозитлар нархида ўсиш давом этмоқда

Март якунларига кўра, сўмдаги кредитларнинг ўртача ставкаси 23,6%гача тушган. Бу январь максимумларига нисбатан 0,5 фоиз бандига арзонроқ. Лекин пасайиш асосан корпоратив кредитлар ҳисобига рўй берган. Балки маъмурий ва директив кредитлаш ҳисобига мартда корпоратив кредитларнинг ўртача ставкаси 22,7%ни ташкил этган (-0,2%). Чакана кредитлар эса 24,7%гача қимматлаган (+0,3%).

Кредитлар бироз арзонлашгани билан депозитлар қимматлашишда давом этган. Ой давомида жами депозитларнинг ўртача тортилган ставкаси 19,9%га етган (+0,2%). Бунда чакана депозитлар ҳам (21,4%, +0,1%), корпоратив депозитлар (18,0%, +0,1%) ҳам қимматлаган.

Бир муддат барқарорликдан кейин валютадаги кредит ва депозитларнинг ставкалари янги рекорд даражага кўтарилган. Март якунларига кўра, валютадаги кредитларнинг ставкаси 10,0%га, депозитларнинг ўртача ставкаси 5,1%га (чакана 5,4%, корпоратив 4,1%) етган.

Валютадаги кредитларнинг сезиларни қимматлаша бошлагани сўмдаги кредитлар дефицити ва валютадаги кредитларнинг афзал кўрина бошлагани билан ҳам боғлиқ бўлиши мумкин. Айрим банклар кейинги кунларда валютадаги 9%гача бўлган омонатларни таклиф эта бошлади, банклар 15%гача ставкада валюта кредит ажратмоқда. Ochish/sharhlash

2024-04-30 10:30:00 Қарор ишлаши учун уни жамият қабул қилиши керак!

Келинг, бир бошдан қайта эслайлик:

Жисмоний шахсларнинг барча банк карталарига келиб тушган пул маблағлари айланмаси 30 млн.сўмдан (шу жумладан, чет эл валютаси миллий валюта эквилентида бўлган тақдирда) ва трансакциялар сони 10 тадан ошган P2P операциялари тўғрисидаги ахборотларни солиқ идораларига тақдим этиш лойиҳасига Сенат ва Савдо саноат палатаси қарши бўлгани, Uzcard эса қоралаб чиққани ёдингиздами?

Марказий банк p2p ўтказмалари учун электрон ҳисобварақалари жорий этилишига қарши бўлгани эсингиздан чиқмадими?

P2P ўтказмалар ҳақидаги ахборотлар солиқ органларига берилиши Янги Конституцияга зид ва ноқонуний эканлиги эсингиздами?

Янги Конституция қабул қилингач, эълон қилинган илк фармонда P2P ўтказмалар ҳақидаги ахборотлар солиқ органларига берилиши талаби бекор қилингани бекоргамасдир?

Нимага унда Солиқ қўмитаси P2P операцияларини ўз назоратига олишга қайта ва қайта уринаверади? Бу нечанчи уриниш? Учинчими ё тўртинчи?

Нега илдиз отган сабаблар билан эмас, оқибат билан курашишга уринишлар тўхтамаяпти?

Солиқчилар истаётган "Товар ва хизматлар учун тўловлар жисмоний шахсларнинг пластик карталари (Р2Р) орқали амалга оширилишини тартибга солиш мақсадида Р2Р операцияларида муайян чегарадан ошган транзакциялар бўйича ўзаро маълумот алмашинуви талабини" Марказий банк қабул қиладими? Марказий банк бир йил, уч йил, тўрт йил аввал ўзи рад этган ва қоралаган қадамга борадими? Нега Конституция, қонунлар ва ўз репутациясини бузиб бунга бориши керак?

Ва нега солиқчиларнинг 4 йилдан буён такрор ва такрор уринишларини жамият қабул қилмаяпти? Ochish/sharhlash

2024-04-30 07:00:02 Кичик бизнеснинг Давлат раҳбаридан бошқа ҳимоячиси йўқми?

Ўзбекистон иқтисодиётининг таянчи бўлиши керак бўлган кичик бизнеснинг на парламентда ва на бизнес манфаатларини ифода этиши керак бўлган Савдо-саноат палатасида вакиллиги мавжуд. Суднинг аҳволини биласиз. Вазирлар-ку фақат битиб кетган олигархлар ва монополистлар билан гаплашишади. Кичик бизнес катталарнинг эшигини қоқиб бора олмаса.

Балки шунинг учун ҳимояти йўқ кичик бизнесга оид айланмадан олинадиган солиқнинг қатъий белгиланган суммада тўлаш тартибини бекор қилинишини истаб қолишгандир. Ахир бу қатъий солиқ тўловчилар на солиқчиларни олдига бўйин эгиб келишса, на турли туман оғзаки тушадиган мажбуриятларни бажаришса. Белгиланган қатъий солиғини тўлайди, бўлди. Бу қанақа бедодлик?

Эътибор беринг, мазкур солиқни кичик бизнес Ўзбекистонда гуллаб яшнаши ва ҳал қилувчи синфга айланиши учун Президентнинг шахсан ўзи тадбиркорлар билан учрашувда таклиф этган эди. Бунга 2 йил ўтгани йўқ. Жорий этилганига энди 1 йилдан ошди.

Шундаям, Президент таклиф этганидек, айланмадан қатъий солиқ тўловчилар бухгалтерия ҳисобини юритишдан озод этилгани йўқ, атайинми ё билиб билмай, Давлат раҳбари топшириғининг шу қисми қарорларга киритилмай ижросиз қолиб кетди. Жойларда айб тополмаса, қатъий белгиланган солиқ тўловчи кичик бизнес субъектларидан бухгалтерия ҳисоботларини сўраш тобора навбатчи практикага кирмоқда.

Хўш, энди нима бўлади? Қатъий белгиланган солиқ механизми ҳали тўлақонли яшашга улгурмай, бекор қилинадими?

Ва Ўзбекистон қарор қабул қилувчиларидан биронта соғлом фикр эгаси чиқиб, бу таклифнинг яширин иқтисодиётга қарши курашишга нима алоқаси бор деб сўраб кўрадими? Ochish/sharhlash

2024-04-29 19:14:19 Ассалом, Париж!

Футбол бўйича Ўзбекистон терма жамоаси Индонезия термасини 2:0 ҳисобида мағлуб этиб, ўз тарихида биринчи марта Париж Олимпиадаси йўлланмасини қўлга киритди.

Бу ғалаба яна шуниси билан тарихийки, 30 йил деганда илк бора Ўзбекистон жамоавий спорт турида Олимпиада ўйинларида иштирок этади. Ochish/sharhlash

2024-04-29 18:24:08 Ўзларини ўзлари қисқартира олмаган ўзбек амалдорлари фельдшер ва фаррошларни қисқартирмоқчими?

Тармоқда анчадан бери мақбуллаштириш шиори остида мактаб, шифохона ва бошқа ижтимоий объектлардаги энг қуйи штат бирликларини қисқартириш таклифи акс этган турли лойиҳалар айланмоқда.

Ҳаттоки қанақадир иқтисодий асослар ҳам келтирилган: фалонча фаррошни қисқартирсак, фустонча бюджет маблағи тежалади қабилида.

Шу ўринда, яна эслатишга тўғри келади: ҳурматли ўзбек чиновниклари, қисқартиришни аввал ўзингиздан бошланг. Ахир мўри малахдек болалаб кетганлар фаррош ва фельдшерлар эмас, айнан сизлар.

Бизнинг хотирамиз қисқа эмас: "Маъмурий ислоҳотлар" натижасида ўзбек чиновникларининг харажатлари 2,8 трлн.сўмга қисқариш ўрнига, 3,3 трлн.сўмга, 17 трлн.сўмгача ошган. Давлат ҳокимияти ва бошқаруви харажатларининг улуши 5,7%дан 6,0%га етган. Ochish/sharhlash

2024-04-29 16:30:00 Мартда банкларнинг депозитлар ҳосили мўл бўлган

Йилнинг дастлабки 2 ойидан фарқли ўлароқ, март ойида банкларнинг депозит базаси фаол кенгайган. Ой давомида жами депозитлар 5,2 трлн.сўмга ўсиб, 243,1 трлн.сўмга етган.

Ой давомида корпоратив депозитлар қолдиғи 2,5 трлн.сўмга ўсган бўлса, аҳоли омонатлар қолдиғи 2,7 трлн.сўмга кўпайган. Бу даврда Миллийбанк (+1,6 трлн.сўм), КДБ банк (+742 млрд.сўм), Ипотекабанк (+661 млрд.сўм), Анорбанк (+549 млрд.сўм) етакчилардан бўлган.

Охирги йилларда бозорда ўта фаол бўлган Капиталбанкда депозитларнинг ўсиши секинлашгани эътиборли. Ochish/sharhlash

2024-04-29 14:30:00 Март ойида ипотека ажратиш суръати сусайган

Март ойида банкларнинг кредит қўйилмалари 5,8 трлн.сўмга ўсиб, 478,2 трлн.сўмга етган.

Ўтган ойда кредит портфели асосан корпоратив кредитлар ҳисобига кенгайган (+4,2 трлн.сўм), чакана кредитлаш суръати сустлашган (+1,6 трлн.сўм). Бу айниқса ипотека кредитлашида яққол кўринган (+473 млрд.сўм). Асосини автокредитлар ташкил этувчи истеъмол кредитларининг ўсиши ҳам камтарлигича қолмоқда (+161 млрд.сўм).

Март ойида кредит фаоллигини "уйғонган" давлат банклари таъминлаган (катта эҳтимол, маъмурий ва директив кредитлар ҳисобига). Агробанк (+1,2 трлн.сўм), Миллий банк (+959 млрд.сўм) ва Саноатқурилишбанк (+941 млрд.сўм) бунда етакчилик қилишган.

Ой давомида муаммоли кредитлар расман 750 млрд.сўмга ошган ва 21,6 трлн.сўмга етган (NPL улуши 4,5%). Шунинг 500 млрд.сўмлик қисми муаммоли активларини очаётган Бизнесни ривожлантириш банкига тўғри келади (банкда менежмент ўзгариши доим яшириб келинган муаммоли активларни очиб кўрсатишга туртки беради). Ochish/sharhlash

2024-04-29 11:45:00 ​Мактаб, боғча ва шифохоналар ўрнини сотиш давом этади, ҳокимларга эса янги саройлар керак

Давлетов Андижонда вилоят ҳокимлигининг янги биноси қурилиши бошланганини ёзмоқда. Эмишки, янги бино “инвестиция маблағлари асосида” 4 гектар ер майдонида барпо этилади.

Албатта, чуқурлашиб бораётган бюджет дефицити шароитида ҳокимларнинг қўша қўша электромобиллар олиши, туппа тузук бор бинолари туриб, янги саройларнинг қуриши ҳеч бир мантиққа тўғри келмайди. Соғлом ақл буни қабул қилмайди. Шунақа тасаввур пайдо бўлмоқдаки, дефицит халқ учун, бу дефицитнинг ҳокимларга алоқаси йўқ.

Вазиятни янада тубанлаштирадиган ҳолат шуки, хон ваколатидаги ҳокимлар ўзларига янги саройлар қурдираётган вақтда мактаблар, боғчалар, касалхоналар, кутубхоналар ўрни сотувга қўйилмоқда.

Биргина Андижон вилоятида сотувга қўйилган 90та объектнинг 47 таси таълимга, тиббиётга ва ижтимоийликка оид. Тиббиёт муассасалари ўрни турли предлоглар билан сотилмаслиги кераклиги ҳақида қанча бонг урдик.

Мактаблар, шифохоналар, университетлар макони "хусусийлаштиришдан" дахлсиз бўлиши ва уларнинг ҳудудини сотиш қонун билан тақиқланиши зарурлиги ҳақида қанча гапирдик.

Биз қанақадир тескари қоидаларга кириб келмоқдамиз. Бу қанақадир янги сюр даража. Ochish/sharhlash

2024-04-29 11:11:35 Битирувчи ва талаба-ёшлар - 2024

Май ойидан бошлаб Тошкентда талаба ёшлар ва мактаб битирувчилари учун катта лойиҳа бошланмоқда. Тошкент шаҳар ҳокимлиги, Олий таълим, фан ва инновациялар вазирлиги ташаббуси билан ташкил этиладиган “Битирувчи ва талаба ёшлар-2024” лойиҳасидан кўзланган мақсад ёшларга тўғри йўналиш бериш, уларнинг келгусидаги режаларини рўёбга чиқаришга кўмаклашишдан иборат эканлиги айтилмоқда.

Шу мақсадда турли тадбирлар, олий таълим муассасалари вакиллари билан учрашувлар ўтказилиши режалаштирилган. Шунингдек, талаба ёшларни қўллаб-қувватлаш, бўлажак кадрларга меҳнат бозорида ўз ўрнини топишга ёрдам бериш, истеъдодли талабаларни рағбатлантириш, уларнинг лойиҳа, ғоя ва илмий ишланмаларини бир ерга жамлаш бўйича ҳам қатор платформалар яратиш устида ишлар олиб борилаётгани маълум қилинибди.

Қуйидаги @talaba_bitiruvchi_bot орқали битирувчи ёшлар лойиҳа аъзоси бўлиш учун ариза топширишлари мумкин. Ochish/sharhlash

2024-04-29 09:01:56 Базавий даврга нисбатан сўмнинг реал самарали алмашув курси мустаҳкамланган

Миллий валютанинг долларга нисбатан курси динамикаси, 2023 йилдаги савдо баланси таркибидаги ўзгаришлар таъсирида I чоракда сўмнинг реал самарали алмашув курси 2023 йилнинг декабрь ойига нисбатан 0,9 фоизга қадрсизлангани айтилганди.

Шу билан бирга очиқланган презентация маълумотларига кўра, базавий давр 2019 йил сентябрига нисбатан сўмнинг реал самарали алмашув курси 7,6%га мустаҳкамланганини кўриш мумкин. Ochish/sharhlash