Robocash Ўзбекистон микромолия бозорига кираётгани яхши, лекин | bakiroo

Robocash Ўзбекистон микромолия бозорига кираётгани яхши, лекин нега Микрокредитбанк орқали?

Микромолиялаш секторида глобал тармоққа эга бўлган Сингапурнинг Robocash PTE LTD компанияси Ўзбекистонда иш бошлайди. Лекин ҳамкор сифатида Микрокредитбанк танлангани савол туғдирмаслиги мумкин эмас.

Тузилаётган қўшма корхонада Микрокредитбанкнинг улуши ва бошқарувдаги иштироки қандай бўлиши, ҳатто янги микромолия ташкилотининг номи ва мақоми (АЖ ёки МЧЖ) ҳам очиқланмаган. Катта эҳтимол, Микрокредитбанк микромолия хизматлари бўйича ўтган йилги Президент қарори талабларини бажариш учун шу ишга қўл урган. Унга кўра, Микрокредитбанк хорижий инвесторлар иштирокида устав капитали 30 млн.долларлик микромолия ташкилоти тузиши керак эди. Ўша пайтда масалага бундай ёндашувнинг хато бўлиши ҳақида айтган эдик. Давлат амалдорлари қўлидаги самарасиз ўйинчоққа айлантирилган Микрокредитбанк аралашган бирон бир лойиҳа муваффақиятли кечиши даргумон.

Айтиш керакки, Robocash Қозоғистон ва Россия бозорида бир неча йилдан бери фаолият кўрсатмоқда (Жанубий шарқий Осиёда айниқса муваффақиятли кейсларга эга).

Robocash 2 йил аввал Ўзбекистонда ўз масъулияти чекланган жамиятини очган эди, IT Park резиденти ҳисобланади, лекин шу кунгача микромолиялаш билан боғлиқ фаолият учун тегишли лицензия ололмаган.

P.S. Айтишларича, Robocash Ўзбекистон микромолиялаш бозорига мустақил ўйинчи бўлиб киришга бир неча йил ҳаракат қилган, лекин уддалай олмаган (бунга балки айрим бозорларда мижозлар маълумотларининг сизиб чиқиш ҳолати ҳам сабаб бўлган бўлиши мумкин). Микрокредитбанк билан қўшма корхона тузилиши қанақадир компромиссга ўхшайди (кейин Микрокредитбанк улушини "хусусийлаштириб" олиш мумкин бўлган).