Иккитадан биринчи ўринбосар янги нормами? Ўзбекистон учун ихч | bakiroo

Иккитадан биринчи ўринбосар янги нормами?

Ўзбекистон учун ихчам ҳукумат ушалмас орзу бўлиб қолаверади.

Мактабгача ва мактаб таълими вазирлиги, Маданият вазирлиги ва энди Энергетика вазирлигида ҳам вазирнинг иккитадан биринчи ўринбосари бўлади.

Вазирликларнинг бир бирига "матрешка" услубида кийгазиш билан бошланган "Маъмурий ислоҳотлар"дан 3 ой ўтмай, вазирликларнинг қайтадан туғилиб, ажралиб чиқиши ёки ҳатто бутунлай янги вазирликларнинг тузилиши ўтган йилнинг асосий трендига айланган эди. Чиновникларни боқиш харажатларини қисқартирамиз, деб бошланган "админреформа" харажатларнинг кўпайишига олиб келгани бежизга эмас.

Энди бу йилги тенденция замларнинг, айниқса иккинчи биринчи замларнинг кўпайтирилиши билан боғлиқ бўлиши мумкин. Нега Маданият вазирлигига иккитадан биринчи зам мумкин, Спорт вазирлигига мумкинмас? Мактабгача ва мактаб таълими вазирлигига мумкин, Соғлиқни сақлаш вазирлиги мумкинмас? Энергетика вазирлигига мумкин-у, Транспорт вазирлигига мумкинмас. Ўзларига ўзлари лавозим ва рўтба ясовчи ўзбек чиновниклари сабаб ва важларни топишади, ишонинг.

Айтишларича, ўтган йилги номинал қисқартиришлардан вазирлик ва идоралардаги раҳбарлар зиён кўрмаган (жуда бўлмаганда мошини ва кабинети бор иш топиб берилган). Асосий зарбани ишловчи ўрта ва қуйи қатлам олган. Ишлайдиганнинг ўзи йўқ, буйруқ берадиган вазир, вазирча ва замлар кўп. Соат тунги биргача вазирлар ё замлар эмас, қора меҳнат қилаётган оддий ходимлар ўтирипти.

Ўзбекистон ЯИМ 2019 йилдан 2023 йилгача жорий нархларда 511,8 трлн.сўмдан 1 066,6 трлн.сўмгача, икки баробарга ўсган. Лекин ўзбек чиновникларини сақлаш (боқиш десак хафа бўлишмасин) учун харажатлар 4,6 баробарга ўсган. Шу рақамнинг ўзиёқ уларнинг қанчалик "семиртириб юборилганини" эканини кўрсатади.

Нормал давлатларда айтайлик, сайланадиган ва ҳисобдор ҳукуматларда иқтисодий ўсишдан кўра бошқарув харажатларининг ўсиб кетиши жамиятда жиддий саволлар уйғотади. Кўпинча бундай тенденция муддатидан олдин сайловлар билан тугайди. Бизнес компанияларда ҳам тушумга нисбатан бошқарув харажатлари ошишни бошласа, айнан бошқарувчилардан воз кечилади. Ишчилардан эмас.