Ёпиқликка кўниктиришмоқдами ё уялишмоқдами? UNG Petro ортидан | bakiroo

Ёпиқликка кўниктиришмоқдами ё уялишмоқдами?

UNG Petro ортидан “Чиноз нефтни қайта ишлаш заводи” МЧЖ ҳам яширин тарзда "хусусийлаштирилган".

"Инвестор" яна ўша, ўтган ҳафта UNG Petro АЁҚШларини харид қилган 101 млн.сўмлик устав капитали билан 5 ой олдин ташкил этилган Petroleum Technology Group МЧЖ.

Битим суммаси номаълум, лекин 101 млн.сўмлик устав капиталга эга субъект аввалига номинал капитали 265 млрд.сўмлик заправкалар тармоғини, кейин номинал капитали 102 млрд.сўмлик нефтни қайта ишлаш заводини сотиб олгани савол туғдириши аниқ (бозор қиймати, рақобатсиз, ҳатто гўзаллик конкурсисиз ўтгани алоҳида савол) .

Тарихда шундай антиқа ишлар бўлган.

Масалан, 20 йил аввал Россияда Ходорковскийдан тортиб олинган Юкоснинг 20 млрд.долларлик активларини 10 минг рубллик капиталга эга Байкалфинансгрупп МЧЖ сотиб олган. Бу кейс иқтисодий адабиётларда хусусийлаштириш қандай бўлмаслиги кераклиги намунаси сифатида эслатилади. Бизнинг кейс ҳам барча белгиларига кўра иқтисодий адабиётларга кириши мумкин.

Ҳозирча, шунча кундан бери Ўзбекнефтегаз mute режимида, ғинғ демайди. Битимларни амалга оширган Давактив ҳам сукутда.

78 заправкани ва нефтни қайта ишлаш заводини қўлган киритган "инвестор" ҳам жим.

Одатда нормал, очиқ хусусийлаштириш битими юз берса, бу яширилмайди, қайтанга, имкон қадар очиқ овоза қилинади.

Бизнинг мисолда шериклар қилган ишидан уялишаётган бўлишлари ҳам мумкин-ку, деган яхши гумон ҳам йўқ эмас.