​Реформалар тўқ қоринга қилинмайди Кеча мис нархининг яна 900 | bakiroo

​Реформалар тўқ қоринга қилинмайди

Кеча мис нархининг яна 9000 долларлик маррадан ўтгани ва 9200+ долларлик коридорга яқинлашаётгани, олтиннинг эса яна 1900+ коридорга қайтгани сарлавҳага чиқарилган матални эсга солди.

Ёздаги минимумларда мис 6700 долларгача, олтин эса 1620 долларгача арзонлаганди. Ва эсласангиз, айнан ёзда кейинга қолдириб бўлмайдиган оғриқли реформалар ҳақида кўп гапирилди. Кейин бу ҳақда унутилди.

Ресурс тавқилаънати осонликча қўйиб юбориши жуда қийин. У, тан олиш керак, қисқа горизонтда доим барқарорлик яратади ва гўёки ҳамиша шундай бўлиб қолиши мумкиндек иллюзияларга мойиллик беради.

Ўзбекистон бюджетининг ўртача чорак қисмини олтин ва мис беради. Тўқ йилларда бу улуш 35 фоиздан ҳам ошади. Охирги 6 йилдаги ҳаракатларга назар солсангиз, олтин ва мис нархи нархи ошгани сари серхарж бўлиб борганмиз, самарасиз сарфлар ва лойиҳаларни туғиш, туғдириш кўпайган.

Боши кетига зўрға уланган 2023 йил бюджетини бу сафар ҳам хом-ашё нархларидаги ўзгаришлар яна бир марта қутқариб қолиши мумкин. Лекин бу бизни янада чуқурроқ жарликка яқинлаштиради. Балки кейин бу жарликдан умуман чиқмас бўлиб тушамиз. Худди Нигерия каби, Венесуэла каби ва балки кўп улги оладиганимиз Россия каби.